Add a dynamically-resized background image to the page.txt Sayed Hafez (sayedhafez948@gmail.com) جارٍ عرض Add a dynamically-resized background image to the page.txt.

أدخل كلمة للبحث

الخميس، 11 يوليو 2024

الرقص على النار- كوميديا تقريباً سياسية

5:43 م  sayedhafez  لا يوجد تعليقات

 

 

الرقص على النار  

كوميديا تقريباً سياسية

تأليف السيد حافظ





مسرحية من إخراج

السيد راضى

 


 

ملخص المسرحية

تأليف السيد حافظ

اخراج السيد راضى

ملخص العمل (الذين يحصدون دائماً)

هم صفوة الناس, يحصدون كل شئ؛ القمح, المال, البيوت, الحب, المتعة, الرخاء, والرفاهية حتى المجد, مجد الحروب والانتصار والبطولات.

بطل هذه المسرحية فلاح بسيط اسمه فاضل عبد السميع. وبطلة هذه المسرحية طماطم أو فاطمة زوجته (عروس وعريس جديدان). فاضل كان جندياً فى سلاح المتفجرات ثم عمل فى فندق الخمسة نجوم. يكتشف فاضل عن طريق مكالمة بالصدفة أن ضيفة الفندق الأميرة قوت القلوب تتعرض لمحاولة اغتيال. فيخبر مدير الفندق. ويقوم هذا الإنسان البسيط بعمل فدائى لإنقاذ الأميرة. وفى ذلك الوقت تحضر طماطم للفندق بحثاً عن فاضل حتى تخبره بأن شيخ الحارة يطلبه حتى يسافر للمشاركة فى أم المعارك.

يذهب فاضل إلى الجيش. وتبحث فاطمة أو طماطم عنه حتى تعرف عنوانه. فتكتشف بعد عذابها أن فاضل فى مستشفى أم المصريين فتصاب بحالة إنهيار, وتدخل معه المستشفى. وفى المستشفى يكتشف أن السيد رئيس الجمهورية سوف يوزع الأوسمة على المقاتلين والأبطال ومنهم فاضل الذى يحصل على وسام.

ويحلم هو وطماطم بأنهما أصبحا يملكان مصباح علاء الدين. فالوسام سيحقق الأحلام والأمانى وكل الأشياء لهما. وتبدأ رحلة الاثنين, فاضل وطماطم.

يكتشف فاضل وطماطم أن الفندق قد عين شخصاً آخر بدلاً منه, وأن الوسام لن يحقق له شيئاً فى الفندق لأنه قطاع خاص, خاصة وأنه ابن الحكومة. فيقيم كشكاً على رصيف الشارع الذى هو ملك الحكومة. وتبدأ معاناته مع رجال البلدية والحى والشرطة والصحفى محروس شعللها. فيذهب إلى التليفزيون لتقديم شكوى إلى المذيعة صفية محمود وهناك يقابل الراقصة الشهيرة كوكى انتظرنى التى ترأف بحاله وتعمل له كشكاً أمام الكباريه.

وتقوم بتشغيل زوجته طماطم فى الكبارية راقصة. وأمام الكباريه يتعرف فاضل على مسعود أحد رجال المقاومة الشعبية فى حرب التحرير ويعجب بمسعود ويقرر تكريم فاضل البطل فى السفارة. وهناك فى حفل التكريم يحصل على وسام آخر. فيصاب بلوثة عقلية. وعند دخوله المستشفى يكتشف وجود أبطال مثله من حرب 48 ، 56 ، 67 ، 73 وكلهم لديهم أوسمة مثله. فيناشد الرئيس بدلاً من الوسام شقة وسيارة ووظيفة معقولة. فالأبطال الحقيقيون فى الشوارع يعيشون وآخرون يحصدون الانتصار والمجد والوظائف الكبرى.



 

شخصيات المسرحية

فاضل (ملفه لدينا يقول) :

الاسم / فاضل عبد السميع عبد المطيع

السن / 29 سنة

المظهر / قوى البنية. ذو ملامح سمراء

المهنة / عامل سويتش فى فندق خمس نجوم

المؤهل / الإعدادية من كرداسة – بالجيزة

الحالة الاجتماعية / متزوج حديثاً منذ شهرين من طماطم زميلته بالمدرسة أيام الدراسة عاش معها قصة حب طويلة. تخرج من الجيش حديثاً وعمل بعدة وظائف, ملاحظ عمال بناء, مساح عربيات, عامل فى محطة بنزين.

الحالة النفسية / هو إنسان نقى, فطرى, بسيط بساطة الماء والهواء وعاشق للناس ولكل من حوله. هدفه فى الحياة بسيط؛ أن يجد سكناً مناسباً فى منطقة المعادى بجوار الفندق الذى يعمل فيه (غرفة وصالة مثلا) أو يجد عملاً مستقلا.

                  فاضل يذهب إلى حرب الخليج ويكون فى طلائع جنود التحرير ويدخل المستشفى. ثم يحصل على وسام رئيس الجمهورية ثم تبدأ معاناته مع الشارع, مع الجهات الحكومية, مع العمدة, مع الوظيفة. إنه زرع ولكن الحصاد ناله غيره. حاول أن يفتح كشكاً لكنه يجد نفسه لا يملك إلا الوسام. وسام من الرئيس قلب نقى, وحلم برئ وزوجته طماطم التى تحلم معه. لكنه فطرى وجرئ وبرئ. هل للبراءة مكان فى عالمنا؟

طماطم (ملفها لدينا يقول ):

الاسم / طماطم زين عبدالهادى. سميت بهذا الاسم حتى تعيش لأمها.

المهنة / تبيع كل يوم ثلاثاء مع أمها الخضار فى سوق كرداسة تشاهد السيارات الفارهة والعرب والسياح قادمين إلى كرداسة. تحلم بأن تعيش فى القاهرة أو الجيزة فقريتها تقع على بعد خمسة كيلوات من شارع الهرم حيث الأثرياء العرب.

الحالة الاجتماعية / متزوجة حديثاً من فاضل, زميلها فى المرحلة الاعدادية. رفضت الزواج من أجله وتأخرت حتى يدبر حاله.

السن / عمرها 29 سنة. تمتاز بالطهارة والنقاء الفطرى.

          عندما يدخل زوجها فى مشكلة تتطور شخصيتها فتتحول إلى شخصية عنيفة, حادة, منتقدة. إنها تكشف وجه القناع عن العالم الذى حولها وتضطرها الظروف إلى العمل كراقصة عند كوكى.

          وتضطرها الظروف إلى مواجهة عسل ابن رئيس الحى وترفض أن تبيع شرفها بعد أن شاهدت زوجها البطل لا قيمة له فى مجتمع غريب.

كوكى /

          كريمة بنت الاسكندرية التى هربت من أهلها وعمرها 14 عاماً بعد أن أرادوا أن يزوجونها من رجل عمره 54 عاماً. وسافرت إلى القاهرة وعملت عند راقصة فى شارع محمد على وتحولت إلى عالم الأضواء وتغير اسمها بدلاً من كريمة إلى كوكى وأصبحت نجمة سينما وتليفزيون. وظل قلبها أطهر من اللبن وأصفى من الماء الصحراوى. بنت بلد. لها شهامة الرجال, ولها اتصالات قوية.

السن / 35 عاماً.

الحالة النفسية / شخصية انبساطية. اجتماعية جداً.

الحالة الاجتماعية / تزوجت مرتين وفشل زواجها. الأول من طبال والثانية من تاجر ثرى ورثت عنه أموالاً طائلة. وعلى علاقة حميمة بحلمى أبو كارت مدير فندق النجوم الخمسة.

 

شخصيات أخرى

شربات : صديقة طماطم. كانت دلالة ثم عملت فى توزيع الملابس من كرداسة إلى المحلات والبيوت. عمرها 27 عاماً. هى بنت الجمالية تعرف القاهرة بيتاً بيتاً وشارعاً شارعاً. أحياناً تلجأ للمكر والحيلة لتحقق أهدافها. تساعد طماطم فى كثير من المواقف.

صفية : صفية عبد القادر. مذيعة جديدة. العمر 24 عاماً. خريجة كلية الألسن. تنتظر فرصتها لتحقيق الشهرة والطموح. مذيعة جديدة بالتليفزيون وهى فى فترة التدريب (الـ6 شهور) حتى يتم تثبيتها فى العمل. إنها قلقة جداً وفى حالة هستيريا خفيفة. تتحرك بسرعة تأكل بسرعة.

حلمى : اسم الشهرة حلمى أبو كارت. مدير فندق النجوم الخمسة. عصبى, ديكتاتورى, انتهازى. معه كروت العالم. يتصل بكل الناس ويعرف كل الناس ويغيب عن البصر إذا احتجت له. إنه شخصية زئبقية. متزوج من امرأة ثرية عجوز ويصاحب الراقصات.

عسل : اسم الشهرة عسل بن رئيس الحى. وهو طالب صباحاً ورجل أعمال مساءاً. عمره 29 عاماً. أعزب ولكنه تزوج عدة مرات فى السر بعقود عرفيه من فنانات شهيرات. مستعد أن يسافر للخارج لشراء دكتوراة, وفتح مشاريع استثمارية. إنه فشل فى الثانوية العامة عشر سنوات ويدرس ثانوية عامة انجليزى.

محروس شعللها : صحفى انتهازى. يلعب بالبيضة والحجر فى يد واحدة. له قدره بارعة على تغيير المواقف. رئيس تحرير جريدة شهيرة (الأيام). يقول غير ما يفعل ويفعل غير ما يحلم. صديق المسئولين, صديق الوزراء, صديق الرؤساء.

طيبة العبد الله : خليجية. عمرها 30 عاماً. خفيفة الظل, مرحة, تعليم عال. تعشق مصر والعرب. صدمت فى أحلامها فى حرب الخليج. تناضل من أجل خدمة قضايا بلدها بطريقتها.

سالم : شاب خليجى. مستهتر. يعيش حياته فى اللهو والضياع فى القاهرة. عند حدوث أم المعارك يتحول إلى شخص آخر ولكن بعد أن تصدمه الظروف.


 

شخصيات اللوحات

الدكتور / عزمى

السفير

جورج سمبو

عبده البواب

وليد: من المقاومة الشعبية الخليجية

موظفون

الظابط

الشرطة

الفتوات


 

الفصل الأول 

اللوحة الأولى

 

(يفتح الستار على حارة فى حى كرداسة. حارة شعبية تجمع بين الحى الشعبى الريفى والمدينة كطبيعة أهل كرداسة. زينات معلقة, لافتات انتخابية؛انتخبوا محروس شعللها لمجلس الشعب, لا تنسو ابن دائرتكم محروس شعللها. كراسى, منصه, ناس تصفق وتهلل, هتيف, لافتة أخرى انتخبوا الصحفى الجرئ محروس شعللها).

هتيف

:

شعللها .. شعللها

المجموعة

:

شعللها .. شعللها

هتيف

:

انتخبوا شعللها

المجموعة

:

انتخبوا شعللها

هتيف

:

والآن كلمة الأستاذ الصحفى الكبير القوى .. الجامد قوى.. ابن الدايرة وابن الشعب وابن مصر كلها.. الأستاذ/ محروس شعللها (تصفيق حاد.. ويلاحظ فوق منصة الاحتفال بالكون وحبل غسيل معلق عليه فوطة وبعض الملابس.. لا أحد ينظر منها.. ولا أهلها يهتمون)

محروس

:

اخوانى.. لقد نزلت هذه الانتخابات بناء على طلبكم بعد وفاة ممثل هذه الدائرة السابق الأستاذ/ سعيد سعد الله ابو السعود.. الذى كان خير سلف لخير خلف وأنا اليوم مضطر للنزول على رغبتكم أن أرشح نفسى للدائرة.

هتيف

:

عاش شعللها .. حبيب الشعب

الجميع

:

عاش شعللها .. حبيب الشعب

هتيف

:

بالروح بالدم نفديك يا شعللها

الجميع

:

بالروح بالدم نفديك يا شعللها

 

:

(تصفيق حاد)

محروس

:

فات اللى فات واحنا ولاد النهاردة.. لكل واحد ظروف وأنا عندى لكم كلمة واحدة .. مش ح اقول زى غيرى كل واحد طياره.. لا.. كل واحد سيارة صغيرة.. عربية صغيرة.. (تصفيق) مش ح اقول كل واحد فيلا فى الهانوفيل.. لا كل واحد شاليه على شط الاسكندرية (تصفيق حاد)

 

:

(يدخل شيخ الحارة إلى أحد الجالسين)

شيخ الحارة

:

ما تعرفش فين بيت فاضل عبد السميع فين؟ فين نمره 20؟

رجل 1

:

البيت هناك اهه .. البلكونة اللى فوق المنصة

شيخ الحارة

:

شكراً (يتجه شيخ الحارة إلى البلكونة)

محروس

:

من فوق هذه المنصة .. أقولكم كرداسة ستكون جنة بل قرية سياحية نموذجية.. يأتيها السياح من كل صوب من العالم (تصفيق شديد)

هتيف

:

عاش ابو العالم

المجموعة

:

عاش ابو العالم

محروس

:

اخوانى اخواتى.. اولادى بناتى.. اليوم نجتمع على أن نتمسك بأصواتنا كل شخص يجب أن يهتم بصوته.. لا تصوت إلا لمن يخدمك لا تصوت

طماطم

:

يا دهوتى .. يا دهوتى

محروس

:

لا تصوت

طماطم

:

يا دهوتى .. يا مصيبتك يا طماطم.. يا خيبة حظك يا دهوتى

محروس

:

يا أخواتى.. كل واحد يمسك صوته مهما كانت الظروف.. فيه ايه ؟ (مازالت طماطم تصرخ) فيه إيه؟ فيه ايه ؟

طماطم

:

(تظهر وتخرج من النافذة وتمسك الرجل شيخ الحارة) ح أرميك من هنا

شيخ الحارة

:

يا ست عيب.. يا ست عيب .. أنا مالى وماله.. الحكومة اللى عايزاه

طماطم

:

عايزينه ليه؟

شربات

:

حرام عليكم

طماطم

:

الحقونى يا ناس

محروس

:

فى إيه ؟

طماطم

:

جوزى يا بيه .. لسه راجع من الجيش والحكومة عايزاه.. عايزينه ليه تانى ؟

محروس

:

مين اللى عايزه ؟

المجموعة

:

مين اللى عايزه ؟

محروس

:

اتكلم يا راجل أنت

شيخ الحارة

:

أنا شيخ الحارة.. باعتين إشارة عايزين فاضل عبد السميع للحضور وتسليم نفسه لأم المعارك فى حفر الباطن

طماطم

:

واشمعنى جوزى اللى تاخده لأم المعارك

شيخ الحارة

:

لأن جوزك مطلوب .. مطلوب مطلوب.

هتيف

:

عاش المطلوب

الجميع

:

عاش المطلوب

محروس

:

اخواتى.. اخواتى.. كلنا فداء الوطن

الجميع

:

كلنا فداء الوطن

محروس

:

كلنا فداء مصر

الجميع

:

كلنا فداء مصر

طماطم

:

(تنزل طماطم وتقف أمام الناس فى الحارة) واشمعنى احنا اللى فداء مصر.. وأنتم لا.. اشمعنى يا باشا.. جوزى لسه راجع من الجيش ما بقلهوش شهر ويادوبك اتجوزنا من أسبوعين.. تاخدوه من الدار للنار يا ناس حرام عليكم

هتيف

:

(ضوضاء) حراكم عليكم

الجميع

:

حرام عليكم

محروس

:

اخواتى.. اخوانى سأتحدث مع وزير الدفاع ووزير الداخلية لتأجيل سفر المواطن.. فاضل عبد السميع

هتيف

:

عاش محروس شعللها

الجميع

:

عاش محروس شعللها

طماطم

:

بتضحك عليا

محروس

:

وأضحك عليك ليه

طماطم

:

يا باشا... احنا تحت أمر الحكومة.. بس سيبونى

محروس

:

فين جوزك

الجميع

:

فين جوزك

طماطم

:

راح الشغل

شيخ الحارة

:

لازم يسلم نفسه الليلة ويروح بكره الجيش

محروس

:

ممكن نأجل الكلام دا

شيخ الحارة

:

الواسطة ممنوعة يا باشا فى الكلام دا.. اذا الجيش طلب ابن الوزير لازم يسلم نفسه

طماطم

:

يا ميلة بختك يا طماطم

شربات

:

يا حظك الخايب يا حبيبتى

طماطم

:

مالحقتيش تتهنى على شهر العسل

شربات

:

ولا حتى شهر بصل

طماطم

:

حيسافر وناكل منين

شربات

:

تاكلى معايا وتشتغلى دلالة

محروس

:

العمل شرف العمل حق.. العمل واجب

طماطم

:

انت ليه ما تروحشى ليه بداله

محروس

:

انا لا يمكن أروح.. أنا بحارب بالقلم

طماطم

:

قلم.. نعم.. نعم يا سى قلم.. شي لله يا قلم ... الناس تروح فى الصحراء وانت قاعد فى التكييف وتقول لى بحارب بالقلم

شربات

:

اديله قلم وصحصحيه

طماطم

:

خسارة فيه (يفز الهتيف)

هتيف

:

لا نريد إلا شعللها

المجموعة

:

لا نريد إلا شعللها

طماطم

:

لا.. لا نريد إلا الفول

المجموعة

:

لا نريد الا الفول

محروس

:

قول ايه يا ست أنت

طماطم

:

لما ياخدو فاضل ناكل منين يا باشا.. ناكل ايه؟

محروس

:

تاكلوا حلاوة.. تاكلوا جاتوه

المجموعة

:

ناكل حلاوة.. ناكل جاتوه

محروس

:

لا للفول

المجموعة

:

لا للفول

محروس

:

والجاتوه للى يحبوه

المجموعة

:

والجاتوه للى يحبوه

محروس

:

واللى يحبك حبه يا هوه

المجموعة

:

واللى يحبك حبه يا هو

طماطم

:

يا ناس حرام عليكم جاتوه ايه.. وعربية ايه.. وشاليه ايه.. دا بيضحك عليكم.. فاضل طلبوه فى الجيش.. وأنا أعمل ايه من غيره.. اعمل ايه ؟

شيخ الحارة

:

يلا روحى نادى جوزك يسلم نفسه.. وإلا ح يروح فى داهية ويبقى خاين

هتيف

:

لا للخونة.. لا للخونة

الجميع

:

لا للخونة .. لا للخونة

 

:

(تبكى طماطم.. وهى تسير مع شربات)

إظلام

 

اللوحة الثانية

الزمان

:

عام 1990م ليلة أول أغسطس الساعة 2 مساءاً

المكان

:

فندق النجوم الخمسة.. الاستقبال.. مدخل الفندق

 

:

على المستوى الأول يمين الاستقبال والخزنة والاستعلامات يقف موظفان عند مكان الاستقبال والخزانة

 

:

على المستوى الأول يسار المصعد الذى يؤدى إلى أعلى

 

:

على المستوى الثانى يمين مدخل يؤدى إلى الكازينو ولافته مضيئة جميلة

 

:

على المستوى الثالث (عمق المسرح) باب دائرى.. يدخل منه ضيوف الفندق أو رواده

الديكور

:

يغلب عليه اللون الأبيض والبنى الفاتح.. والشياكة والأناقة والفخامة (عند فتح الستار يدخل الراقصون والراقصات فى تابلوه استعراضى.. ستائر ملونة فى المسرح وحاملات التابلوه بما معناه)

 

:

1-   عالم غريب.. عالم عجيب.. ناس تزرع وناس تحصد

2-   عالم لا مكان فيه للضعفاء .. عالم الأقوياء

3-   حكاية الليلة.. حكاية الصغار فى عالم الكبار

4-   انتبهوا لنا واستمعوا واستمتعوا بحكاية الشرفاء فى عالم اللصوص سارقى تعب الآخرين

5-   يا أهل السهر .. هذه ليلة ساهرة ضاحكة من القلب إلى العقل.

 

:

(بعد التابلوه الاستعراضى.. ترتفع الستائر ويدخل الديكور كما وصفناه من قبل)

 

:

(عند رفع الستار ودخول الديكور نجد أننا فى بهو أحد الفنادق الفخمة وبعض العملاء يقفون أمام الاستقبال)

موظف 1

:

مفيش ولا غرفة فاضية يا فندم

زبون

:

مش معقول أنا متعود أنام هنا واحجز هنا.. أنا شخصية هامة عايز جناح

موظف 1

:

يا فندم عندنا شخصية هامة جداً حاجزة 6 أجنحة

زبون

:

يعنى أنام فى الشارع.. فين الحجز بتاع الفاكس بتاعى

موظف 1

:

الفاكس وصلنا

المدير

:

(يدخل بضوضاء) فين فاضل يا اسماعيل.. فين الزفت اللى اسمه فاضل؟

موظف 1

:

فى السويتش يا فندم

المدير

:

مش موجود فى الزفت .. شوفهولى يا اسماعيل

موظف 1

:

حاضر يا فندم

المدير

:

(ينظر لموظف 2) وأنت واقف تعمل ايه؟ شوفولى فاضل فين بسرعة

موظف 2

:

كان رايح يصلح خط غرفة 243

المدير

:

اطلع شوفهولى فى غرفة 243

موظف 2

:

حاضر

المدير

:

الأمن فين ؟

موظف 3

:

الأمن أخد أجازة .. الأميرة قوت القلوب أعطيتهم أجازة وجابت أمن من عندها

المدير

:

شوفولى فاضل فين

 

:

(الموظفين يجرون يميناً ويساراً بحثاً عن فاضل)

الزبون

:

حضرتك المدير؟

المدير

:

ايوه انا

الزبون

:

انا كنت حاجز بالفاكس فجيت مالقتش حجز لى

المدير

:

احنا متأسفين الحجوزات كتير.. وعندنا شخصية هامة حاجزة 6 أجنحة.. وعندنا حفل تنكرى يا حضرة (ثم يمسك الهاتف يضرب رقم) الو .. الو .. هوم سيرفس.. فاضل عندكم.. لا.. طيب دورولى علي الزفت فاضل.. ايوه فاضل عامل السويتش ايوه (يضع السماعة)

 

:

(ضوضاء شديدة.. تدخل كوكى مع فرقتها)

كوكى

:

مساء الخير يا حلمى

المدير

:

أهلاً وسهلاً ست الكل كوكى.. قلبى.. قلبى بيوجعنى يا كوكى انتظرى

كوكى

:

حلمى يا أبو كارت.. بطل حركاتك دى

المدير

:

قلبى بيدق .. بيدق يا كوكى.. طيب مدى ايدك شوفيه.. راقصة الشرق الأولى وحبيبة قلبى

كوكى

:

اوعك تغلط قدام الناس.. راقصة الشرق الأولى غصبن عنك.. مش كل من لبست بدلة الرقص رقاصة المودة.. يا حلمى يا ابو كارت

المدير

:

عيون حلمى ابو كارت.. قلب حلمى ابو كارت.. اذا كان كارتر وبوش وكنيدى وقعوا ف غرامك.. حلمى ابو كارت يروح فين.. كوكى كوكى يا مدرسة يا رقص وفن وهندسة

كوكى

:

كان الرئيس السادات الله يرحمه يقول لكارتر.. كوكى دى الهرم الخامس

المدير

:

يا سلام يا سلام.. ما انا عارف.. لما قالت لى الأميرة قوت القلوب عايزة رقاصة درجة أولى.. قلت كوكى.. دى عاملة حفلة تنكرية كبيرة

كوكى

:

تنكرية ايه.. دى اخت امبراطور بلاد كوكى بومى

كوكى

:

قلت لها حاخد كام

المدير

:

فقرة نص ساعة بخمسين ألف دولار

كوكى

:

دا غير بقشيش الفرقة

المدير

:

قلت لها .. كوكى انتظرنى ست الفن الشرقى

كوكى

:

وسع لى وسع لى يا حلمى ابو كارت.. حوش كارت وقع منك

المدير

:

بتألسى عليا يا كوكى.. انا اللى معايا كروت الدنيا.. كارت من رئيس الوزراء.. كارت من رئيس الحى.. كارت من الرئيس كارتر وبوش وكلينتون وكارت من اللى بعد كلينتون كمان.

كوكى

:

هو مين اللى بعد كلينتون

المدير

:

هوفر

كوكى

:

بطل يا راجل كلامك دا.. وسع لى وسع لى فين اللى ما يتسماش اللى بيطلع وينزل .. فوق وتحت

المدير

:

الأسانسير.. الليفت.. ادوس الزرار يجى حالاً

كوكى

:

يلا يا ولد انت وهو

حامل الملابس

:

حاضر يا استاذة (يركبون المصعد)

كوكى

:

أى تليفون يجيلى طلعه فوق يا حلمى يا ابو كارت (تختفى فى المصعد)

المدير

:

فكرتينى (يلتفت إلى الموظفين) فين الزفت اللى اسمه فاضل.. بسرعة فيه تليفونات جايه

 

:

(يدخل عسل ابن رئيس الحى متنكراً فى زى حمار)

المدير

:

ايه دا حمار.. أول مرة أشوف واحد يتنكر فى لبس حمار (يضحك) حمار

عسل

:

(يتضايق ويخلع عن فوق رأسه رأس الحمار) فيه حمير كتير عايشه ومس حاسة بنفسها زيك كده يا حلمى يا ابوكارت

المدير

:

(مفزوعاً) معقولة.. عسل باشا.. عسل باشا ابن رئيس الحى.. مش معقول.. يا باشا.. ايه اللبس دا.. دا غريب

عسل

:

انا فكرت اعمل مفاجأة والبس لبس غريب

المدير

:

حمار.. مالقيتش غير اللبس دا

عسل

:

نفسى افهم

المدير

:

اآمر يا باشا

عسل

:

كوكى بتحب فيك ايه.. يا حلمى يا ابو كارت

المدير

:

كوكى بتحب فيا كل حاجة

عسل

:

اشك

المدير

:

بتحب كروتى.. اى حاجة تعوزها اطلع كارت من كروتى تتحل مشكلتها فى الحال

عسل

:

لا .. إلا كوكى.. هى اللى تقدر تطلعك من المشاكل

المدير

:

انا وكوكى فولة واتقسمت نصين

عسل

:

نفسى اضرب بينكم اسفين

المدير

:

ليه يا باشا

عسل

:

ما تتجوزها

المدير

:

مش راضية

عسل

:

ليه ؟

المدير

:

بتقول ح اقطع رزقها

عسل

:

ليه ؟

المدير

:

بتقول الفنانة من غير جواز معجبينها كتير وكله عنده أمل وعشم واذا اتجوزت خسرت معجبينها

عسل

:

كلام مظبوط,عطلتنى.. عن اذنك للحفلة

المدير

:

اتفضل يا باشا .. كل عظماء الدولة موجودين وانت أولهم

عسل

:

كله جاى للبزنس يا بيه.. دى ست بتتاجر فى السلاح.. بتتاجر فى البترول .. بتتاجر فى اليورانيوم.. تتاجر فى الدهب والماس.. ست كده عشرة على عشرة

المدير

:

ولها أصحاب كتير

عسل

:

ولها أعداء اكتر.. أكيد من المافيا اللى بتحس أن اللى بيتاجر فى الممنوعات بيدخل معاهم فى السوق منافسهم.

موظف 1

:

يا سيادة المدير مش لاقيين فاضل

المدير

:

يعنى ايه مش لاقيينه.. الأرض انشقت وبلعته

عسل

:

عن اذنك (يدخل إلى المصعد)

المدير

:

لازم أكسر دماغه.. ادشدشه.. كان حيودينا فى داهية شوفهولى (بعصبية)

 

:

(يتحركون فى كل الأرجاء.. وضوضاء يدخل فاضل وهو يشد مجموعة أسلاك فى يده)

المدير

:

كنت فين ؟

فاضل

:

مش لاقيه.. عمال أدور عليه مش لاقيه

المدير

:

هو ايه اللى مش لاقيه

فاضل

:

اسمه ايه (يشير إلى الأسلاك)

المدير

:

السلك

فاضل

:

عليك نور.. الخط بتاع السلك مش لاقيه يا باشا دا خط ساخن بيلسع.. ودا خط بارد بتاع أوروبا.. ود خط ريحته جاز من الخليج.. ودا خط مالهوش صاحب

المدير

:

انت يا فندى يا محترم وصلت الخطوط غلط

فاضل

:

يعنى كل حاجة ماشيه صح .. والخطوط هى اللى غلط

المدير

:

انت وصلت خط كان جاى للأميرة قوت القلوب فى جناح تانى.. لولا أن ربنا ستر.. كنا حنروح فى داهية

فاضل

:

مفيش دقيقة تمر وترن.. ترن.. الأميرة قوت القلوب.. الو.. الأميرة قوت القلوب.. قولت احول للأوضة التانية الغلابة اللى مفيش حد معبرهم ايدتهم خط يتسلوا فيه شوية

المدير

:

انت بتهزر يا افندى.. ازاى تدى خطها لأوضة تانية

فاضل

:

تصدق وتؤمن .. العمدة بتاع بلدنا بحاله ما بيجلهوش تليفونين فى اليوم .. العمدة بحاله.. شوف الدنيا .. أميرة تبقى أعلى من العمدة.

المدير

:

يا ابنى افهم.. العمدة دا ما يجيش حاجة جنب الأميرة.. يا ابنى انا عارف إنك بتفهم بصعوبة.. العمدة دا تحت السلم والأميرة فوق السلم.

(يدخل اثنان من ضيوف الحفل التنكرى قرد مع غزال)

فاضل

:

ايه دا !! قرد مع غزال

المدير

:

اهلا يا باشا .. اهلا يا هانم.. اتفضلوا اتفضلوا (يفتح لهم الأسانسير)

فاضل

:

أول مرة أشوف قرد ماشى مع غزال والمدير بيفتح لهم الباب.. هى الأكاندة دى بتستقبل حيوانات.. انتم حتعملوا حديقة حيوان خمس نجوم.

المدير

:

أنت مالكش دعوة.. روح اقعد على السويتش يا غبى

فاضل

:

الوردية بتاعتى خلصت

المدير

:

وردية ايه ؟ اسمها شيفت

فاضل

:

انا ماشى .. احسن فاطمة مستنيانى

المدير

:

زميلك اعتذر وانت حتحل محله.

فاضل

:

لا أنا مش فاضى.. فاطمة مستنيانى فى البيت هى وأمها

المدير

:

مفيش فاطمة .. فيه شغل.

فاضل

:

ما اصل انا قايلها تعمل لنا كوارع.. إنما ايه ترم العضم اصل أنا عريس جديد..

المدير

:

ماليش دعوة بيك.. انت حتقعد فى الشيفت دا كمان.. زميلك عيان بيموت وانت لازم تقعد

فاضل

:

لا حول ولا قوة إلا بالله.. اصله بيتصنت على الخلق فى التليفونات.... (يدخل أحد الموظفين يكلم المدير)

المدير

:

انا مش فاضى لك.. الأميرة قوت القلوب عايزانى.. ما تمشيش خد بالك جناح 15-16-17-17-18-19-20

فاضل

:

اقوله ايه دا.. انا عازم حماتى واخوات طماطم على الكوارع.. لما ادخل السويتش (يذهب إلى غرفة السويتش أمام المسرح)

 

:

والله لا أنا مفرجهم.. دى عيشة ايه الغلب دى.. (جرس) الو .. غرفة 925 .. حاضر.. لما احول المكالمة.. احولها ازاى؟ انا سامع الكلام وبعدين اعمل ايه؟ انا سامع كل حاجة

المتحدث

:

ايشلونك يا ألطاف تمام

المتحدثة

:

ايشلونك انت كيف احوالك فى مصر

المتحدث

:

والله يا ألطاف من المسجد للأوتيل ومن الأوتيل لزيارة أولياء الله الصالحين سيدنا الحسين رضى الله عنه وستنا عائشة.

فاضل

:

كذاب يا الطاف ما تصدقهوش.. كل يوم فى الكازينو بيعلب قمار.. قمار ويخسر

ص المتحدث

:

شنهو هذا.. شنهو هذا.. خطوط متدخلة

فاضل

:

نتعذر لهذا العطل الفنى

ص المتحدثة

:

اجول فرج لا تنسى تغطى راسك من المكيف

فاضل

:

دا بينام عريان.. والمكيف شغال

ص المتحدثة

:

شنهو هذا .. ايش فيها الخطوط

ص المتحدث

:

هذه مصر خطوط متداخلة.. فى امان الله يا غاليه فى امان الله

ص المتحدث

:

يوسبيك انجلش You Speak English

فاضل

:

Yess

ص المتحدث

:

رووم نامبر 315

فاضل

:

Yess

 

:

(صوت مسجل يتحدث انجليزى بشكل سريع جداً)

أما الانجليز دول شطار فى الانجليزى.. كل واحد تلقاه لبلب.. (جرس الهاتف) الو

ص رجل 1

:

غرفة 777

فاضل

:

حاضر (يحرك السلك)

ص 1

:

ايه انت نمت ولا ايه.. ايه اخبارك يا توتو

ص 2

:

كله تمام يا سوسو (بصوت اجش)

فاضل

:

مسخرة رجاله صوتهم زى الوحوش ويقوله يا توتو والثانى يقوله يا سوسو

ص 1

:

اسمع.. الساعة دلوقت اتناشر إلا ربع.. حتلبس لبس الجرسون وتشيل صنيه عليها طربوش

ص 2

:

عارف وتحت الصينية الجهاز

ص1

:

وتطلع الأسانسير عند قوت القلوب وتقدم لها الطربوش وتقولها دى هديه

ص2

:

تاخد الطربوش أول ما تمسكه بايديها تتكهرب وتموت

ص1

:

واذا حد تانى اخد الطربوش

ص2

:

يا غبى

فاضل

:

نعم

ص2

:

مش انت هو

ص 1

:

نعم .. عايز ايه ؟

ص2

:

لو ما مسكتش الطربوش ارمى الجهاز اللى تحت الطربوش حتنفجر القنبلة فى الحال

ص 1

:

وتنفجر القنبلة وتموت الأميرة قوت القلوب .. علشان تبطل تتاجر فى السلاح والبترول وتلعب فى ملعب غير ملعبها

ص2

:

انا عايز العشرة مليون بتوعى

ص 1

:

بعد ما تموت ونستريح من قرفها.. باى باي (صوت اغلاق السماعة)

فاضل

:

يا ولاد الإيه.. واحد يلبس جرسون ويدخل شايل صينيه عليها طربوش ويقدمها هدية للأميرة قوت القلوب.. وبعدين اعمل ايه.. لازم اقول للمدير يا مدير.. يا مدير.. (يخرج جرى تجاه الاستقبال)

موظف 1

:

فيه ايه يا فاضل؟

فاضل

:

شوف لى الزفت اللى اسمه المدير

موظف 2

:

وطى صوتك بتقول ايه

فاضل

:

لازم اقول له على اللى سمعته.. فين الزفت اللى اسمه المدير

موظف 1

:

سمعت ايه يا ولد يا مجنون انت

فاضل

:

يا ناس يا هوه .. شوفولى الزفت اللى اسمه المدير

 

:

(يدخل اثنان متنكران نابليون مع امرأة ترتدى ملاية لف)

فاضل

:

ايه دول .. نابيلون اتجوز نفيسه

موظف 2

:

دول ضيوف الحفلة التنكريه

فاضل

:

يا ناس حيتنكر فى ملابس جرسون.. فين الزفت اللى اسمه المدير انا عايزه

المدير

:

(يظهر المدير) بتقول ايه يا ولد

فاضل

:

انت نايم على ودانك.. انت مش حاسس ايه اللى بيجرى حواليك يا استاذ.. انت صحيح بتفهم بطئ بس افهمك ازاى

المدير

:

فيه ايه يا ولد يا مخبول

فاضل

:

انا سمعت مكالمة جاية لغرفة 777

المدير

:

انت بتتصنت على الناس يا ولد.. إنت مفصول

فاضل

:

مفصول مفصول .. بس ح اقولك الخطوط والجهاز باظ وبعدين الساعة دلوقت اتناشر إلا عشرة وبعد عشر دقائق الأميرة قوت القلوب حتنفجر فيها قنبلة أو تموت بالكهربا.. وفضيحة الفندق حتبقى بجلاجل

المدير

:

انت بتقول ايه يا ولد.. جبت الكلام دا منين ؟

فاضل

:

من الغرفة 777

المدير

:

يا صفوت (لموظف 1) شوفولى مين ساكن فى غرفة 777

موظف 1

:

دى واحدة ست مشلوله

المدير

:

(يضحك) هأ.. هأ.. ست مشلوله.. شوف الولد دا بيقول ايه

فاضل

:

انا قلت وانت حر .. انا ماشى

المدير

:

لا مش حتمشى

فاضل

:

لا.. ح امشى.. مش انت طردتنى دلوقت

المدير

:

يا ابنى الكلام اللى بتقوله دا خطير.. مؤامرة لقتل الأميرة قوت القلوب

فاضل

:

وهيلبس جرسون وصنيه وطربوش

المدير

:

فين الأمن.. الأمن فين

فاضل

:

امن مين يا حضرة.. الأمن روح والأميرة قوت القلوب قالت لهم روحو.. الأمن بتاعى يحرسنى

المدير

:

لازم حد يقوم بالمهمة

فاضل

:

ايوه.. لازم حد

المدير

:

راجل يهمه اسم مصر.. سمعة مصر.. السياحة فى مصر

فاضل

:

ايوه راجل.. جدع كمان وقلبه زى الحديد

المدير

:

والقدر اختارك أنت لهذه المهمة.. تدخل على الأميرة

فاضل

:

انا مطرود.. على الجزمة الوظيفة 180 جنيه فى الشهر

المدير

:

رجعتك الشغل بـ 250 جنيه

فاضل

:

ما ينفعش

المدير

:

ح اديك 300 جنيه

فاضل

:

وعايز سلفة 3000 جنيه

المدير

:

موافق

فاضل

:

وازاى  ابقى موظف بـ300 جنيه وما عنديش شقة

المدير

:

ح اديك شقة فى المساكن الشعبية منحة من الأميرة

فاضل

:

لا عايزها دلوقت.. ما تعملش زى الحكومة وعدتنى وسابتنى

المدير

:

ح اكتب لك شيك بقيمة الشقة  علشان تضمنها واديك كارت لوزير الاسكان

فاضل

:

موافق على الشيك والكارت يا باشا

المدير

:

اسمع يا فاضل انت حتلبس لبس تنكرى علشان تدخل للأميرة قوت القلوب

فاضل

:

حيوان

المدير

:

انسان .. ح تلبس ايه ؟

فاضل

:

وزير حربية وألا قائد لها

المدير

:

تلبس لبس ضابط وتدخل الحفلة واذا لقيت الجرسون جاى بالطربوش

فاضل

:

امسكه واقبض عليه.. دول معاهم اسلحة

المدير

:

خد مسدسى اهه

فاضل

:

مسدس؟ ايه دا؟.. مسدس صحيح

المدير

:

ايوه .. مسدسى الشخصى.. ودا كارت شخصى منى اذا حصل لك اى حاجة طلع الكارت وقدمه

فاضل

:

واذا مت

المدير

:

اذا مت حتبقى شهيد.. واطلع صورتك فى مدخل الفندق جنب صور المشاهير

فاضل

:

يا أوي انت.. يا فالح انت.. يا جدع انت.. ما تروح انت بدالى

المدير

:

لا .. أنا لا.. انا اللى بربى عقليات جباره.. انما انت وامثالك كتير

فاضل

:

يعنى ايه ؟

المدير

:

انت يا ابنى بطل.. بطل.. والشباب هم الأبطال وهم اللى بيضحوا وانا أوعدك انى ح اعملك كارت باسمك .. ح اديك كارت

فاضل

:

مش عايز كارت

المدير

:

فاضل.. يا بنى.. انت فى مهمة وطنية والأميرة قوت القلوب ضيفة مصر كلها وأنت اللى اخترناك وحنمشي وراك علشان تنقذها.. انت رجل المهام الصعبة.. روح يا ابنى والبس هدوم ظابط الأمن

فاضل

:

واشمعنى انا

المدير

:

لأن أنت اللى سمعت المكالمة وحتلبس ضابط أمن وتدخل الحفلة وترقص مع الأميرة قوت القلوب

فاضل

:

يا عم انا متنازل عن كل دا

المدير

:

اذا لقيت المجرم اضربه

فاضل

:

يا عم انا قعدت تلات سنين فى الجيش ما ضربتش حد بالنار

المدير

:

جاتلك الفرصة انك تضرب بالنار

فاضل

:

ممكن اكلم طماطم مراتى

المدير

:

لا كلام الان هذا وقت العمل.. يلا يا ابنى (يدخل إلى الغرفة)

فاضل

:

استنا

المدير

:

لا .. دقت ساعة العمل .. يلا يا ابنى (يختفى فاضل والمدير)

ص شربات

:

(من الخارج) والله لو تنكسر رقبتك ما ادفع غير جوز جنيهات.

ص السائق

:

(من الخارج) هى عافية وألا عافية.. الذوق يا ذوق

ص شربات

:

هم جوز جنيهات

ص السائق

:

حرام عليكى

ص شربات

:

حرمت عليك عشتك يا بعيد.. يا منيل على عينك كلكم حرامية مفيش (تدخل شربات) رحمة فى قلوبكم.. جاتكم نيله

 

:

(ترتدى شربات بنطلون جينز وترتدى قبعه عليه.. وتمسك فى يدها مروحة)

موظف 1

:

(يترك المكان ويذهب اليها) مساء الخير يا هانم

شربات

:

مساء النور

السائق

:

(يدخل خلف شربات على المسرح) يا هانم.. يا هانم

شربات

:

ايه الولد الحرامى دا.. إزاى يدخل هنا

السائق

:

انا اللى حرامى.. انا عايز حقى.. عرض المشوار دا بخمسه جنيه على الأقل

موظف 1

:

فيه ايه يا ابنى.. ممنوع الكلام اللى انت بتعمله دا ها.. اتفضل بره.. اتفضل بره

السائق

:

اصل

موظف 1

:

بقولك اتفضل بره

شربات

:

الأشكال دى لازم تروح السجن

السائق

:

انا اللى اشكال؟ .. والله ما انا سايبك لا انت ولا الست اللى معاكى (يختفى السائق ويخرج)

شربات

:

من فضلك شوف لى الهانم اللى بره

موظف 1

:

انهو هانم

شربات

:

الست الحلوه اللى واقفه هناك دى ولابسه فلاحة تتعارك مع السواق

موظف 1

:

ايوه يا هانم .. حفلة الأميرة قوت القلوب

السائق

:

(يدخل السائق مرة أخرى) انا قتيلكم الليلة دى

شربات

:

المتوحش دا .. طلعه بره ارجوك

موظف 2

:

مش معقول يا اخ انت ح اجيب لك البوليس

شربات

:

يا طماطم .. يا طماطم ادخلى.. بردون يا خويا

موظف 1

:

انا مش عارف ايه الحكاية

طماطم

:

جرى ايه مالكم .. كل واحد واقف وحاطط ايه فى جيب التانى.. تاكسى يعنى تسعيره زى البنزين ما هو بتسعيره

موظف 2

:

أهلا يا هانم .. أكيد انت متنكره وجايه حفلة الأميرة قوت القلوب (فاطمة ترتدى زياً ريفياً جميلاً ومنديل مزركش)

طماطم

:

قوت القلوب عارفاها.. دى جارتنا وحبيبتنا .. دى مرات حسن زلموكه

شربات

:

زلموكه بتاع اللبن

موظف 2

:

الأميرة ليها حاجات غريبة وأصدقاء غرباء.

طماطم

:

يعنى قوت القلوب بقت اميره شوفى الحظ يا شربات

شربات

:

حظ..حتقوليلى على الحظ.. زلموكه كان يدور ويلف على البيوت ويلف بيت بيت ويقول لبن.. لبن.. شوفى بقى لقى شنطة فيها ماس وألا ذهب.. عارفه البنت لواحظ

طماطم

:

عارفه عارفه بطلى غلبة

 

:

(يدخل رجلان كاوبوى يرتديان ملابسهما ومعهما مسدسات صوت)

رجل 1

:

هالو

شربات

:

هالوه لولى.. راجل حاطط فى ودانه حلق

طماطم

:

ايه المسخرة دى.. راجل حاطط فى ودانه حلق (يدخلان المصعد)

المدير

:

(يدخل) فيه ايه يا صفوت فيه مشاكل عندك

موظف 1

:

لا يا فندم

المدير

:

خللى بالك من أى واحد لابس طربوش عنيكم عليه

طيبه

:

(تدخل) مش معقولة التسيب اللى فى الفندق ده

 

:

(امرأة خليجية .. سمراء فى سن الثلاثينات.. ترتدى العباءة.. جادة)

المدير

:

فيه ايه يا هانم

طيبه

:

التليفون .. بتاع السويتش ما بيرد.. وين راعى البدالة شفهوها الخرابيط وين المدير وين السفير وين الوزير

المدير

:

انا حلمى ابو كارت.. اتفضلى (يعطيها كارت) دا الكارت بتاعى.. اذا احتجتى اى حاجة تسجيل عقارات بيع وشراء استيراد.. تصدير.. سياحة .. سلاح.. بترول.. تحت امرك

طيبه

:

جوز عن سوالتك هذه.. ما تدش راضين.. اكوا أوتيل خمس نجوم بداله

المدير

:

لا طبعاً

طيبه

:

وين وزير السياحة.. وين وزير الدولة وين السفير.. ابى اقدم شكوى.. أبى الحين اخرج من ها الفندق

المدير

:

يا هانم مش معقول.. تكونى زعلانة كده.. أصل موظف التليفونات مريض.. والسويتش عطلان وبعتنا نصلحه

طيبه

:

انتم ما تقدرون المسئولية .. يعنى ايش مريض.. ايشلون تتركون الفندق كده

طماطم

:

هدى نفسك يا حبيبتى

طيبه

:

انا ما اهدى نفسى.. وما احب تتكلمين معاى

شربات

:

خلاص .. خلاص حقك علينا

طيبه

:

ابى اعرف شفهو اسم الموظف المسئول عن البدالة

المدير

:

فاضل عبد السميع عبد المطيع

طماطم

:

جوزى

شربات

:

وطى حسك

طيبه

:

فاضل هذا لازم يدش السجن

طماطم

:

سجن.. سجن ايه بقى.. اسم الله اسم الله عملك ايه فاضل.. سرق وألا سرق.. حرامى وألا حرامى.. دا اشرف من الشرف قال سجن قال

طيبه

:

فاضل هذا يستحق السجن

طماطم

:

سجن ايه بقى ان شاء الله ... سرقك.. وألا سرقك

طيبه

:

هذا يعطل الدنيا.. الوقت ماله حساب عنده.. وانت يا مصريين ديرتكم احسن ديره بس الوقت عندكم ماله حساب.. وفاضل دا مثاله يشووهون البلاد هذا فاضلوه تقلسون رأسه.

شربات

:

فاضل زى الفل

طماطم

:

فاضل دا لو شفتيه.. لو كلمتيه لو قعدتى معاه تلاقيه احسن راجل فى الدنيا

طيبه

:

لازم يتحقق معاه ويدش السجن

طماطم

:

انتى ضيفه .. وعيب عليكى تدخليه السجن

شربات

:

الصلح خير يا هانم

طيبه

:

فاضل هذا فاشل

طماطم

:

فاضل فاشل.. فاشل ليه .. يا اسمك ايه فاضل دا ينام فى السرير يتهز هز يدخل الحمام الإحم بتاعته تهز جدران البيت.. صحة وعافيه خمسة وخميسة تحت قدامه اربع تجواز حمام يقوم بيهم .. صحة وعافيه

طيبه

:

وين المدير .. وين السفير.. وين الوزير بتاع السياحة

طماطم

:

ما تحبيكهاش قوى يا هانم (يدخل احدهم يهمس للمدير)

المدير

:

يا جماعة .. يا جماعة مش معقول.. فيه عندى مشكلة كبيره فى الحفلة عن اذنكم (يتحرك المدير ويصعد فى المصعد) (وهو على باب المصعد) يا محفوظ حل المشكلة

موظف 2

:

حاضر يا باشا

طيبه

:

وين راح هذا.. ما سوى شئ لفاضل

طماطم

:

ما تسيبك من فاضل وبعيدن بطلى حزق احسن يطئ لك عرق

طيبه

:

ولى

طماطم

:

ولى انت

شربات

:

ولى انت يا حبيبتى

طيبه

:

روحى

طماطم

:

روحى انت

شربات

:

روحى انت يا حبيبتى

طيبه

:

والله اشق وجهك شق

طماطم

:

تشقين ايه.. والله دا انا اعمل كتافك بسطرمة

طيبه

:

شفهو هذه

طماطم

:

ما تشفهويش

شربات

:

ما تشفهويش علينا

طيبه

:

يا مرة انت وهى اكفينا شركم

طماطم

:

انا مره

شربات

:

مرة ايه يا شابه

طيبه

:

ايه مره

طماطم

:

امال انت ايه يا وليه مش مرة

موظف 2

:

مش كده ..مش كده يا جماعة

طماطم

:

أنا اسمى السفيرة طماطم

طيبه

:

و أنا عمى سفير وخالى وزير وابوى عضو مجلس الأمة

موظف 1

:

سفيرة وقعت مع بنت هيئة دبلوماسيه .. أكيد فيه سوء تفاهم .. يا حضرات يا صاحبات العصمة

موظف 2

:

يا جماعة الخير .. اتفضلوا على الحفلة.. اتفضلوا على الحفلة

طماطم

:

حفلة ايه؟

شربات

:

تعالى نطلع نتفرج

طماطم

:

اخاف يختى

شربات

:

ما تخافيش وراكى رجالة.. ما دام حتعملوا حفلة احنا موافقين

موظف 2

:

اتفضلوا .. اتفضلوا

طيبة

:

انا ما اروح حفلة.. أنا ابى الموظف اللى اسمه فاضل ايشلون يقطع الخط عن غرفتى

شربات

:

ما هو قالك المدير.. الخطوط كلها عطلانة

طماطم

:

الست دى.. مالها ومال فاضل

موظف 2

:

اتفضلوا الحفلة فوق

طماطم

:

لا يمكن اتحرك إلا لما أشوف الست دى مالها ومال فاضل

موظف 1

:

يا سعادة السفيرة مش معقول.. احنا عايزين نحل المشكلة

شربات

:

(وتهمس لطماطم) الراجل صدق إنك سفيرة

طيبه

:

أنا أبى أفهم مفهو المسئول عن هذا الوقت الضائع ومفهو هذه

موظف 2

:

احنا عايزين امين جامعة الدول العربية يحل المشكلة

سالم

:

(يخرج من الكازينو) فلوسى.. فلوسى راحت.. يا جونى

طيبة

:

مين اللى باجوك

سالم

:

ف الكازينو باجونى

طيبه

:

وين المدير الريال.. باجوه وانتم ساكتين وين ها المدير التعبان

 

:

(يظهر المدير هابط من الأسانسير)

المدير

:

انا المدير حلمى ابو كارت.. مدير الفندق أى خدمة

طيبه

:

تبجون الريال

طماطم

:

يعنى ايه باجونى باجونى

المدير

:

يعنى سرقونى.. ودا بيحصل كتير لما زبون يخسر فلوسه

طيبه

:

تلعب قمار (تدفعه) ما تشحتش على وجهك.. وتقول باجونى.. باجونى

طماطم

:

اتنيل على عينك يا قمرتى

شربات

:

مش معقول يا سعادة السفيرة

طماطم

:

قمرتى وكمان لك نفس تقول سرقونى.. اتنيل

طيبه

:

عند رقض

طماطم

:

وقفت.. أنا بشتمه هو .. ايش دخلك انت

طيبه

:

لا تسبينه .. أنا اللى اسبه بس.. هذا ولد ديرتى

طماطم

:

طيب اشتحيه انت

طيبه

:

شايف فضحتنا قدام الأجانب

طماطم

:

اسم الله هى دى الشتحيه.. اشتحيه عدل قوليله يا ناقص

سالم

:

اسكتى ولا كلمة

طيبه

:

حسنى والله حسنى عليك فضحتنا (تدفعه)

طماطم

:

(تتعجب بما تفعله طيبه) باين عليكى ست جدعة وأنا أحب الستات الجدعة اهى الأشكال دى اللى بتقول المصريين سرقونا

طيبه

:

لا أحنا نحب مصر.. وأمثال هذا ما نصدبهم وأمثال اللى اسمه فاضل ما نحبهم عامل البدالة اللى معطل مصالحنا

طماطم

:

الله بقى ما انت كنتى ماشيه كويس.. سيبى فاضل فى حالة

طيبه

:

لا ما اسيبه .. ايشلون اسيبه.. وأنا ابى أكلم ولدى فى لندن وأكلم زوجى فى امريكا وبنتى فى سويسرا وأخوى فى بان كوك.. وأنا رامى ومرات أخوى اخترنا مصر.

طماطم

:

سامعة يا شربات

شربات

:

شوشو هانم يا سعادة السفيرة

طماطم

:

حاضر والله خلونا سفيرة يا شربات ولو دخلنا الحفلة جايز اتعين فى منصب كبير كبير.

طيبه

:

وين فاضل

موظف 2

:

فاضل فوق فى الحفلة

طماطم

:

يلا بينا على الحفلة

شربات

:

يلا بينا

طيبه

:

وانا معاكم ايه (يركبون المصعد)

 

:

(موسيقى فرحة .. مع تغيير الديكور إلى الحفل التنكرى)

إظـــــــلام


 

اللوحة الثالثة

 

:

(يتحول الديكور إلى حفل تنكرى)

 

:

(حفل موسيقى صاخب.. رجل يرتدى أسد.. امرأة ترتدى غزال احدهم يرتدى زى حمار.. أخر يرتدى زى راسبوتين.. أحدهم يرتدى زى هتلر وآخر زى قرد.. وآخر زى أسد.. وآخر زى كلب.. تدخل فاطمة ترتدى زى الفلاحة ومعها شربات.. وتقدم برنامج الحفل داخلى)

المذيع

:

(متنكراً فى زى كلب) والان نقدم لكم استعراض راسبوتين.. تقدمه الراقصة الشهيرة كوكى انتظرنى مع فرقتها.

 

:

(تدخل موسيقى الراب مع استعراض راقصات روسيات وتدخل كوكى انتظرنى مع راسبوتين فى استعراض ايقاعه سريع. تؤدى الراقصات الروسيات مع كوكى انتظرنى وبعد انتهاء العرض والتصفيق)

قوت القلوب

:

شئ مش معقول.. رائع رائع

 

:

(يقف خلف قوت القلوب فاضل عبد السميع فى زى ضباط أمن.. يجد أمامه فى مدخل الصالة للحفل رجل يدخل يرتدى طربوشاً.. يلاحظ أن البيست فى يمين المسرح فكل مستوياته أسفل ووسط وأعلى وفى وسط ويسار المسرح يوجد الضيوف وقد جلسوا موائد.. طعام وشراب (عندما يشاهد فاضل الرجل الذى يرتدى طربوش...)

فاضل

:

(يجرى نحوه) قفشتك

الرجل المهم

:

فيه ايه؟

فاضل

:

بقولك ايه انا سمعت المكالمة وعارف كل حاجة.. امشى قدامى من غير شوشرة.. معايا مسدس

الرجل المهم

:

انت بتقول ايه يا مجنون انت

فاضل

:

وطى صوتك.. احنا مش عايزين شوشره معايا مسدس

الرجل المهم

:

(فاضل يخرج مسدسه أمام الرجل) ايه دا ؟

فاضل

:

دا مسدس .. معاك سجاير

الرجل المهم

:

بتقول ايه ؟

فاضل

:

معاك قنبلة .. طلعها من تحت الطربوش

الرجل المهم

:

انت مجنون اكيد .. أنت عارف أنا مين ؟

فاضل

:

لا مش عارف انت مين .. عارفك طبعاً.. ارهابى مجرم متسلق.. مافيا.. معاك قنبلة

الرجل المهم

:

انت هربان من مستشفى الأمراض العقلية أكيد

فاضل

:

امش قدامى

الرجل المهم

:

الحقينى يا أميرة قوت القلوب.. الحقينى

فاضل

:

أمش قدامى من غير شوشرة

قوت القلوب

:

فيه ايه يا باشا

فاضل

:

الحقينى يا أميرة الراجل دا سمعته فى التليفون عايز يقتلك بقنبله ومخبيها تحت الطربوش

الرجل المهم

:

الراجل دا مجنون أكيد

فاضل

:

انا مجنون طيب اخلع الطربوش

الرجل المهم

:

لا مش ح اقلع الطربوش

فاضل

:

لا أقلعه

قوت القلوب

:

أقلع الطربوش يا محى باشا

الرجل المهم

:

أهه .. قلعته (نجد أن الرجل أصلع تماماً .. يضحكون)

فاضل

:

والله انا سامعهم فى التليفون حتى أسألى الأستاذ حلمى ابو كارت المدير بتاعنا وحتى أعطانى مسدسه وحتى قالى

قوت القلوب

:

خلاص.. خلاص (مقاطعة) انت علشان بتخاف عليا انا ح اديك مكافأة عظيمة

فاضل

:

ربنا يخليك يا هانم.. أنا محتاج شقة ومحتاج عربية ومحتاج وظيفة محترمة

قوت القلوب

:

ما سألتنيش هديتك ايه فاضل.

فاضل

:

اللى هتدهولى ح خده يا هانم

قوت القلوب

:

انا اديك شرف.. انك ترقص معايا (يصفق الجميع فى صرخات وهرج ومرج)

شخص 1

:

برافو

شخص 2

:

شئ رائع

شخص 3

:

يا بختك يا عم

شخص 4

:

أنت ضيف شرف الليله

قوت القلوب

:

موسيقى (تضرب الموسيقى .. فاضل يرقص معها وهى تعلمه كيف يرقص.. موسيقى حالمة.. اضاءة سوفت ناعمة.. ازرقات ثم سبوت لايت عليهما)

فاضل

:

(بلاى باك) وانت كنت فاكر حتكسب الشقة والعربية والوظيفة (تدخل فى تلك اللحظة طماطم مع شربات.

طماطم

:

يا لهوى يا لهوى .. يلا بينا نرجع

شربات

:

هو انت لسه شفتى حاجة.. يا بنت ادخلى

طماطم

:

ايه دا.. احنا فى جنينة الحيوانات.

شربات

:

لا يا بنت احنا فى حفلة أولاد الزوات

طماطم

:

واحنا يعنى اولاد الـ..

شربات

:

أوعك تنطقيها.. أحنا احسن ناس يا بنت

طماطم

:

ماهو باين (تتهكم عليها) اذا كنا احسن ناس ما كنتش رحت لك علشان تجبينى هنا وأنا خايفة ادخل الفندق واشحت منك الهدوم دى

شربات

:

عيب عليكى ما تقولى الكلام دا

طماطم

:

اهو شيخ الحاره جه وطلبه.. اعمل ايه انا دلوقت لازم أشوفه

شربات

:

اهو فى الحفلة .. وأكيد متنكر

طماطم

:

(تجد شخص يرتدى ملابس فلاح) قفشتك يا فاضل

الرجل 5

:

ايه دا يا هانم

طماطم

:

غلط يا خويا سامحنى

شربات

:

سورى يا باشا حسبناك فاضل باشا

الرجل 5

:

خلاص.. خلاص..

شربات

:

شايفه .. الست الحلوة دى

طماطم

:

شايفة الأفندى الطويل العريض.. يشبه فاضل

شربات

:

بس دا نضيف شوية

طماطم

:

اخرسى هو فاضل وسخ.. دا فاضل أفضل راجل

شربات

:

يا بنت.. الراجل بكلمته مش بلبسه وهدمته

طماطم

:

اسمعينى يا شربات أنا خايفة على فاضل

 

:

(يدخل جرسون وفى يده صنيه وعليها طربوش.. فاضل يلمحه يوقف الرقص)

فاضل

:

المجرم اهه .. امسكوه (يضحك الجميع.. يرجع الرجل المجرم ويعود للخلف مهرولاً.. امسكوه.. امسكوه (يجرى فاضل ويمسكه ويمسك الصينية ويهرب الرجل)

فاضل

:

الطربوش تحته قنبله

طماطم

:

فاضل.. فاضل.

فاضل

:

طماطم الطربوش تحته قنبله (يضحك الجميع وفاضل يشعر الحرج) صدقونى .. يا حلمى باشا.. يا حلمى يا ابو كارت الحقنى

 

:

(يدخل حلمى المدير مسرعاً وينظر إلى فاضل وهو يتنفس الصعداء وسبوت على فاضل وفاطمة وقوت القلوب ويضحكون جميعاً)

المدير

:

كفايه ضحك.. صدقوه.. دى الحقيقة.. فيه قنبله تحت الطربوش

قوت القلوب

:

بتقول ايه يا حلمى باشا

المدير

:

ايوه يا هانم.. فيه قنبله تحت الطربوش.. واحنا اتصلنا بخبير المفرقعات مالقتهوش.. راح ياكل طعمية عند الجحش فى السيده.

فاضل

:

انا كنت بتاع ألغام ومفرقعات فى الجيش

المدير

:

يعنى تقدر يا فاضل تفك اللغم

فاضل

:

اقدر يا باشا

قوت القلوب

:

مش معقول انا فى حلم ولا فى علم

المدير

:

ولا حد يتحرك ولا حد يعمل اى حركة.. جايز كلنا فى لحظة واحدة

طماطم

:

لا يا فاضل اوعى تفك اللغم والقنبله.. احسن تنفجر وتموت.. وتموت ليه.. علشان الناس ديا الناس ديا.. متعرفهاش ولا تعرفنا ولا حتعرفنا لا احنا من ثوبها ولا هى من توبنا.. مش الناس ديه بتزرع لها وهى اللى بتحدنا .. أوعى تفك اللغم سيبهم يموتوا ويلا بينا نمش من هنا وناكلها بالملح والعيش الحاف.. مش دول اللى قالولك مفيش شغل فى الحكومة مفيش شكل فى القطاع العام .. مفيش سكن شعبى.. مفيش سكن بالإيجار سيبهم يموتوا ولا يروحوا فى ستين داهية.

فاضل

:

مقدرش مقدرش يا طماطم.. مقدرش اشوف الناس محتاجة لى وأنا واقف ساكت مقدرش ممدش ايدى ليهم.. أنا عارفهم عارف ان قلوبهم قاسية.. زى الحجر الصوان عارف.. عارف أن الزفت اللى بيشربوه فى ليلة واحدة اللى اسمه وسكى تمنه يجوز الف بنت.. والف شاب م الغلابة اللى زى حالتنا عارف أن ممكن حفل زى الليلة دى تقدر تخلى الف.. لا ألفين لا.. ثلاثة تلاتلاف فقير.. زى وزيك ليهم بيت صغير ودكانه وعجله بجرس ترن ترن ترن وسع.

طماطم

:

لا يا فاضل عمرهم ما هيبطلوا شرب الويسكى ولا الحفلات ولا حيدونا بيت ولا دكانة ولا عجلة ولا حتة كوتش ولا هيبطلوا مسخرة ابداً أبداً.. سيبهم يموتوا

المدير

:

اوعك تسمع كلامها يا فاضل .. اسم مصر.. سمعة مصر.. شرف مصر.. كل ده بين ايديك.. ولو جرى لك حاجة حاتكتب تحت اسمك .. هذا البطل صنع فى مصر .. ترلالالا لالالا.. بص شوف فاضل بيعمل ايه

عسل

:

(يتدخل وهو مفزوعاً) يا ابنى .. انت الان فى الميدان.. الامتحان.. يوم يكرم المرء أو يهان.. فتقدم يا بطل الأبطال .. وانقذ ضيوف مصر الكرام.. وحبايب مصر العظام.. وانا وانت ودقى يا مزيكا.

طماطم

:

أوعك يا فاضل تسمع كلامهم.. سيبهم يموتوا

فاضل

:

مقدرش.. ايدى بتكلنى لازم أفك اللغم.. مقدرش اسيبهم.. وانا عارف متأكد أنهم مغفلين ما بيحبوش الناس اللى زينا ولا بيجولنا إلا لما يبقوا محتاجين لنا وأنا عارف ربنا كويس ولازم اغفر لهم زى ربنا ما بيغفر لنا.. ومتقوليليش عنهم أى حاجة أنا عارف كل حاجة.. من أول حلمى أبو كارت وعسل الحسنى ابن رئيس الحى وكوكى انتظرنى.. عارفهم بس ما قدرش اتخلى عنهم هما عملو فيا.. وفيك وفيهم.. (يشير إلى الجمهور) ما هو دول أهلى وناسى.

طماطم

:

فاضل لآه.

الجميع

:

فاضل آه

فاضل

:

توكلت على الله.. واشهد أن لا اله إلا الله وأن محمد رسول الله .. بسم الله .. (ضوء على فاضل وهو يفك اللغم وينتزع الفتيل)

(ترقب وحذر.. موسيقى.. ترقب.. قوت القلوب والجميع فى فزع)

فاضل

:

بسم الله توكلت على الله (ينزع الفتيل) بسم الله .. الحمد لله.. وقفت الانفجار.

قوت القلوب

:

شكراً.. شكراً.. (صياح وهرج ومرج ويحملونه على أكتافهم.. ويهتفون باسمه)

الجميع

:

عاش فاضل .. عاش فاضل.

هتيف

:

عاش فاضل.. عاش فاضل.

طماطم

:

يا فاضل .. يا فاضل اسمعنى.. ياللا بينا نروح شيخ الحاره عايزك.

فاضل

:

عايزنى ليه.. واشمعنى الساعة دى.

طماطم

:

عايزينك فى حفر الباطن.. تحضر أم المعارك وتفك الألغام والقنابل

فاضل

:

سترك يا رب.. اغيثنا يا مغيث.

 

:

(موسيقى مع تغيير الديكور إلى مكتب مدير الفندق حلمى أبو كارت)

 

إظلام


 

اللوحة الرابعة

 

:

(غرفة المدير حلمى أبو كارت.. يجلس على المكتب.. يفتح الراديو بجواره موسيقى مارشات عسكرية)

المذيع

:

(من المذياع) ولقد بدأت تحتشد قوات 32 دولة من جميع أنحاء العالم فى حفر الباطن تحت مظلة الأمم المتحدة ولقد أعلن الرئيس بوش .. أن المعتدى لابد أن يفهم أن النظام العالمى الجديد يرفض احتلال دولة لدولة .. هنا لندن (صوت موسيقى نشرة الأخبار فى إذاعة لندن).. (جرس الهاتف)

المدير

:

(يغلق المذياع ويرفع سماعة التليفون) ايوه يا درويش ابعت لى بوكيه ورد لابن الوزير التربنتى.. وحط عليه كارت باسمى.. ايوه ابعته على الفيلا بتاعتى علشان راجع من شهر العسل من أوربا.. وابعت لى كمان بوكيه ورد للأمير زوز بتاع مدينة النوزوكا بنزو علشان هو عامل عيد ميلاد ابنه فى الباخرة السياحية.. التوتو بسرعة بسرعة.

 

:

(يدخل بليه عند كلمة هو عامل)

بليه

:

(فراش سمين.. عريض دمه خفيف) يا سعادة المدير فيه واحدة بره عايزه تقابل حضرتك.

المدير

:

(جرس الهاتف) الو.. كوكى.. مش معقول.. كوكى انتظرنى آه يا قلبى معقول يا كوكى.. مش رايح.. أنا قاعد فى المكتب مش طالع.. باى باى..

بليه

:

يا باشا فيه واحدة ست عايزاك.

المدير

:

(يعدل الكرافتة) اكيد عايزة خدمة او كارت.. خليها تتفضل.

بليه

:

اتفضلى (يخرج من الباب ويشير للمرأة بالدخول)

المدير

:

(تدخل طماطم) ايه دا مين دى؟

بليه

:

دى الست طماطم مرات فاضل.

المدير

:

فاضل مين.

طماطم

:

مش عارف فاضل مين.. يا خيبتك يا طماطم.. يا خيبتك يا طماطم.. نسيت فاضل.. فاضل البطل اللى انقذ الأميرة قوت القلوب فى الحفلة من شهرين.

المدير

:

اخرسى وطى حسك.. انتى فى فندق محترم.. احنا كل يوم عندنا أميرات وعندنا حفلات حنفتكر ايه وألا ايه.

طماطم

:

تفتكر ايه وألا ايه .. عيب عليك.. مش انت الراجل ابو كارت بتاع الوزير فلان والوزير علان قلت لى أى حاجة تعوزيها اطلبينى فى الحال وادينى جيت لك.

طيبه

:

(تدخل طيبه) صبحك الله بالخير يا أستاذ حلمى (وهى حزينة منكسرة)

المدير

:

(يقف باحترام شديد) أهلاً وسهلا طيبه هانم أى خدمات.

طيبه

:

أنا ابى اسيب الأوتيل وأدور على شقة مفروشه أرخص.

المدير

:

مش ممكن لا يمكن.. الكلام اللى بتقوليه دا غلط.. انت ضيفتنا.

طيبه

:

كتر الله خيركم ما قصرتم يا المصريين.. بس أبى ادور على سكن أرخص شوية وصار شهرين للحرب.

طماطم

:

ما تخافيش يا حبيبتى فاضل سافر هناك يفك الألغام ويحارب وحيرجع ان شاء الله.. وبلدكم محررة وبيتنا مفتوح لك يا حبيبتى . أى وقت تجيبنى

طيبه

:

السفيرة طماطم.. والله ما قصرتى.. المصرى حيفضل مصرى.

طماطم

:

طيبه

طيبه

:

السفيرة طماطم (تحتضنان)

المدير

:

(يخرج منديلاً ويبكى بصورة كاريكاترية ) عاش الوطن العربى عاش.. يا جماعة يا جماعة قلبى ضعيف.

طماطم

:

بيتنا وعنوانا معروف أول ما تنزلى فى كرداسة تسألى شربات الدلاله صاحبتى أنا فى البيت اللى جنبها.

طيبه

:

طمنينى على جوزك.

طماطم

:

قولى لهم يطمنونى

طيبه

:

طمنها يا ابو كارت

المدير

:

ان شاء الله احسن.. أنا ح اديها كارت يحل المشكلة على طول.. وأنت ارجوك اطمنى.. أنتى زبونة الفندق وضيفتنا.

طيبه

:

استأذن انا الحين أروح أفطر كروسان وهانى.

المدير

:

كلنا تحت أمرك يا هانم.

بليه

:

(يدخل) عسل باشا وصل.

المدير

:

عسل باشا.. يا أهلا وسهلاً يا أهلا وسهلا.

طماطم

:

عرفاه ابن رئيس الحى.. الخدوم الإنسان

عسل

:

حلمى أبو كارت.. انا تدينى بومبه وما تجيش فى الميعاد.

المدير

:

سامحنى يا باشا كوكى انتظرنى هى اللى عطلتنى.

 

:

(يقف المدير مصافحاً عسل باشا)

طماطم

:

يا عسل باشا (تقترب منه) يا عسل باشا الحقنى.

عسل

:

أهلا .. عايزه حاجه (يخرج نقوداً يعطيها لها)

طماطم

:

(تنحنى لتقبل يده).. لا يا باشا.. انا مش شحاته.. انا مرات فاضل.. صنع فى مصر.. ترلا.. ترلا.. ترلا .

عسل

:

اللى سافر أم المعارك.. دا بطل كبير

طماطم

:

أنا مش عايزاه بطل.. انا عايزاه زيكم هنا كده.. لا يحرر ولا يجرجر مش عايزاه هناك.. عايزاه هنا زيكم

عسل

:

مش ممكن لا هو ييجى مكانا ولا احنا نروح مكانه .. يا حلمى.

المدير

:

ايوه يا باشا

عسل

:

خللى أى حد يحل المشكلة دى.. خلاص يا ستى اطمنى فوتى على بكره.

طماطم

:

لا .. أوعى تفتكرنى هابلة وألا هابلة.. عايز تخلينى اصدق.. إن حلمى ابو كارت بقى حلمى فوت علينا بكره.. دا الخير والبركة.

بليه

:

(يدخل مندفعاً) الست كوكى انتظرنى وصلت بره.

المدير

:

(يقف مفزوعاً) نجمة الشاشة.. سندريلا الرقص الشرقى

عسل

:

اهى جاتلك يا عم.

المدير

:

لازم تجينى

كوكى

:

(تدخل كوكى) فين الزفت اللى اسمه حلمى ابو كارت

المدير

:

كوكى .. كوكى.. عسل باشا أول ما سمع إنك جايه قرر إنه ينتظرك

كوكى

:

والله..

عسل

:

امال كام واحد يتمنى يشوف كوكى.. (يمد يده للسلام)

كوكى

:

لا مش اسلم عليك.. مخصماك.. مخصماك (بدلال) زعلانه منك يا وحش

عسل

:

ليه بس ربنا ما يجبش زعل.

كوكى

:

الأرض بتاعة الساحل الشمالى ما عطتهانيش ليه.

عسل

:

دى عمولتها 14 مليون دولار يا كوكى.

كوكى

:

وايه يعنى (بغضب) 14 مليون دولار هى الكعكة فى ايد اليتيم عجبة.

طماطم

:

يا بشوات .. يا بهوات دلونى.. فاضل فين.

كوكى

:

مين دى يا باشا.. مش انتى بتاعة الحفلة.

طماطم

:

كويس إن لقيت حد يفتكرنى.

كوكى

:

مالك يا حبيبتى.

طماطم

:

مش لاقيه حد يحل مشكلتى.

كوكى

:

حل مشكلتها يا حلمى يا ابو كارت.

المدير

:

ايوه يا كوكى ح أحل مشكلتها آه  (يخرج كارت من جيبه) ايوه ح أحل المشكلة فى ثوانى دى نمره وزير الحربية 63522 ايوه سيادة الفريق وزير الحربية موجود.. مش موجود طيب قوله حلمى أبو كارت مع السلامة.. اهه خلاص كلمته اتحلت المشكلة استريحتى.

طماطم

:

حرام عليك.. حتروح من ربنا فين.. بتضحك عليا ليه.. هو انت فاكرنى هابلة وألا هابلة.

كوكى

:

ارجوك يا عسل باشا حل مشكلة الست دى.. احسن قلبى حيتقطع.

عسل

:

حاضر يا ست الكل (يمسك الهاتف ويضرب رقما)

كوكى

:

اسمعى يا بنت انتى.. جسمك عاجبنى تيجى تشتغلى معايا واعلمك الرقص اللى على أصوله وتبقى ايه نمره.. نمره تهز العالم.

طماطم

:

اشتغل ايه رقاصة.

كوكى

:

اتنيلى حد طايل.. يلقى شغل فى الأيام دى.

عسل

:

ألو.. انا عسل بن رئيس الحى.. ايوه يا باشا.. يا باشا احنا لنا طلب عند سعادتك فيه عسكرى اسمه.. جوزك اسمه ايه.

طماطم

:

فاضل ابن ستيته.

عسل

:

ايوه اسمه ستيته.

طماطم

:

ابوه اسمه عبد السميع ابن نفسيه

عسل

:

يا بنت أنا بسألك عن اسمه جده.

طماطم

:

اسمه عبد المطيع ابن بهية.

عسل

:

ايوه يا باشا فاضل عبد السميع عبد المطيع.. ايوه سافر من شهرين أنا ح استنى مكالمة منك أنا عند حلمى ابو كارت مدير فندق الخمس نجوم .. مع السلامة.

كوكى

:

مرسيه .. مرسيه يا عسل باشا.

عسل

:

هو احنا فى ديك الساعة لما تحبنى يا قمر.

كوكى

:

قمر قمر ايه.. انا القمر وألا صاحبتك السنكوحة الفاشله اللى بتقدم مسلسلات بايخة وأفلام بايخة.. وبعت رجالتك يضربوها على الطريق السريع علشان راحت تقابل الضانى به فى مرسى مطروح.

عسل

:

دى اشاعات يا حبيبى من المعارضة.. من الفئة الحاقدة مش لاقيين فى الورد عيب.. قالوا دا احمر الخدين.. صحيح أنا ابويا رئيس الحى.. لكن عرفت أتاجر بمصروفى وأنا فى الجامعة وأجمع الثروة دى.

كوكى

:

عسل باشا الحسنى.. بقولك ايه وحياة ابوك رئيس الحى.. أنا فهماك وعجناك وخبزاك وعرفاك وحفظاك.

المدير

:

بلاش ندخل فى الكلام اللى بيوجع الرأس يا جماعة.

طماطم

:

(جرس الهاتف) التليفون دا علشان فاضل.

المدير

:

(يرفع السماعة) الو ايوه عسل باشا موجود.. تليفون يا عسل باشا.

عسل

:

ايوه يا باشا (يتحدث فى الهاتف) ايوه اسمه فاضل عبد السميع عبد المطيع .. فين فى القاهرة من أسبوعين.. مستشفى أم المصريين.. عنده ايه.. عدى على ميت لغم وفكهم وبعدين جاتله حالة بقى يجرى من الألغام ... متشكرين يا باشا (يضع عسل السماعة)

طماطم

:

مستشفى ايه ؟ وعنده إيه ؟

عسل

:

فاضل سليم وحى يرزق.. بس هو تعبان شويه.

طماطم

:

يعنى ايه تعبان شويه.. هما عملوا فيه ايه.. دا كان زى الفل.

عسل

:

 متصاب.

طماطم

:

يا خرابى.. يا خرابى فاضل متصاب.

عسل

:

مش متصاب برصاصة .. دا عنده حالة عصبية.

طماطم

:

يعنى أنا متجوزة دلوقتى فاضل العصبى.. الناس تقول عليه ايه مرات العصبى.

عسل

:

انت دلوقتى تروحى تشوفيه فى مستشفى ام المصريين غرفة 212.

طماطم

:

خدوه من أم المعارك لأم المصريين.. يا قلة بختك يا طماطم.. يا حظك المايل.. ح أقول لهم ايه فى كرداسة.. ح أولهم ايه فى البلد.. وانتم ساكتين ليه (تنظر لحلمى وكوكى وعسل) مش دا اللى انقذكم.

المدير

:

(يرتبك) انا مش ح اسكت (يخرج مجموعة من كروت كبيرة) انا عارف أكبر دكاترة البلد ح اخليهم يشوفوه.

كوكى

:

وانا ح ارقص له لحد ما أعصابه تهدأ.

عسل

:

وأنا ح ازوره فى المستشفى (يخرج عشرة جنيه يعطيهم لطماطم) وانتى خدى دول فكى نفسك بيهم.

طماطم

:

عشرة جنيه (تصرخ) عشرة جنيه أعمل بيهم ايه.. البطل عندكم بعشرة جنيه.. ثمن بطيخة ولا شمامة وألا نص كيلة لحمة.. بطلكم وراجلكم بنص كيلو لحمة بعشرة جنيه.. حرام عليكم يا مفتريين عشرة جنيه (تصاب بحالة عصبية) ورونى جوزى فين ؟ عشرة جنيه للبطل.

المدير

:

الست جالها حالة عصبية.

عسل

:

الست دى ودوها المستشفى حالاً.

كوكى

:

ودوها القصر العينى.

طماطم

:

لا .. ودونى ام المصريين مع فاضل.

إظـــــــــــــــــلام

 

 

اللوحة الخامسة

 

:

(يفتح الستار في مستشفى أم  المصريين.. هرج ومرج وضوضاء.. على السرير ينام فاضل.. لا تظهر رأسه)

رجل الأمن 1

:

(رجل يدخل يفتش.. يبحث هنا وهناك ثم يفتح النافذة ويغلقها)

الممرضة

:

فيه ايه يا خويا ؟

رجل الأمن 1

:

مالكيش دعوة.. وسعى السكة يا ست انتى.

الممرضة

:

حاضر

 

:

(يخرج رجل الأمن 1 ويدخل رجل الأمن 2)

رجل الأمن 2

:

(يحمل جهازاً غريباً يدور ويفتش .. ويفتح النافذة ويغلقها)

الممرضة

:

هو فيه ايه ؟

رجل الأمن 2

:

وانتى مالك .. وسعى السكه.

الممرضة

:

(وهى فى خوف وقلق) حاضر يا باشا.

رجل الأمن 2

:

(يتحدث فى الهاتف) كله تمام يا فندم.

فاضل

:

(يزيح الغطاء من على نفسه ويتحدث فى حالة قلق) فيه ايه الناس دول جايين كده .. فيه ايه يا عم.

المخبر

:

(يدخل وهو يحمل جهازاً .. يبحث تحت السرير ويفتح النافذة ويغلقها)

فاضل

:

هو فيه ايه ؟ الناس دى بتدور على ايه ؟

رجل الأمن

:

ما تشغلش نفسك خليك فى حالك.

فاضل

:

هو فيه حد نط من البلكونه وللا الشباك.

رجل الأمن

:

ما قلتلك اسكت.

 

:

(يدخل عزمى مدير المستشفى وخلفه مجموعة من الأفراد)

عزمى

:

أنا ما احبش الإهمال.. ما احبش أى واحد فى مستشفى ام المصريين يكون له مشكلة.. فى عهد الدكتور عزمى لازم (يتوقف عن الحديث عند مشاهدة المخبر) ايه دا !! أنت مين ؟

المخبر

:

(يهمس فى أذنه بأصوات غير مفهومة) تمام يا فندم

عزمى

:

انت بتهزر .. مش معقول.

المخبر

:

(يهمس مرة أخرى فى أذن عزمى) تمام يا فندم.

عزمى

:

أنت أكيد بتهزر .. بقى هو بنفسه حيجى هنا.. طيب فين وزير الصحة.. فين الوزراء .. فين الـ (صوت سرينة تنبيه الشرطة) تمام يا فندم (وهو يصيح فى حالة هيستيريه) الرئيس جاى هنا.

فاضل

:

(يرفع رأسه مفزوعاً) فيه ايه؟

عزمى

:

الريس جاى.

فاضل

:

(يغطى رأسه) أهلا وسهلاً يجى (يرفع الغطاء مرة أخرى) انت قلت مين ؟

عزمى

:

الرئيس جاى هنا.

فاضل

:

(يضحك) ما هو أنت رئيس المستشفى والمدير.

عزمى

:

لا يا غبى الرئيس الكبير جاى.

فاضل

:

(يغطى رأسه بالملايه وينام) يا عم بطل هجايس الرئيس يزور مستشفى أم المصريين.

رجل أمن 3

:

(يدخل ومعه اللاسلكى) كله تمام يا فندم فتشنا العنابر والغرف كلها من غرفة 212 اتحدث.. نمر يتحدث.. كله تمام.

 

:

(استعراض : أهلا بالريس.. أثناء الاستعراض يدخلون عمال الديكور بالبوية والزينة ويضعون كل أنواع الزينة وأوراق الديكور.. هاتف جديد.. دش.. تليفون .. لافتة كبرى كتب عليها أهلاً بالريس.. كلمات الاستعراض تقول ....)

كله تمام يا ريسنا.. وفاضل يغنى معهم بما معناه.

راح أقول على العمدة بتاعنا إللى سرق كام فدان

ويقول له عزمى لالالالالا

(عند انتهاء الأغنية تتحول الغرفة إلى غرفة جديدة ووضع وحالة جديدة وينام فاضل ويغطى رأسه)

الممرضة

:

ممكن اطلب من حضرتك طلب بسيط (يرفع الغطاء من على رأس فاضل)

فاضل

:

افندم.

الممرضة

:

اقلع

فاضل

:

نعم .. اقلع

الممرضة

:

ايوه اقلع.

فاضل

:

وده الطلب البسيط

الممرضة

:

ايوه (تعطيه ملابس داخلية جديد وقميص وبنطلون) اتفضل أقلع وغير هدومك تحت الملاية.

فاضل

:

مش قالع

الممرضة

:

بقولك اقلع

فاضل

:

الريس جاى.. بيقولوا ومفيش وقت.

عزمى

:

(يدخل بصوت مرتفع) اتفضل يا أستاذ .. مفيش وقت.

فاضل

:

(بصوت مرتفع وعصبية) حاضر.

عزمى

:

غطى نفسك بالملاية (يغطى فاضل نفسه بالملاية ويختفى تحت الملاية وعزمى يخرج مهرولاً) شوفولى وزير الصحة على التليفون وللا رئيس الحى.. صحيح الريس جاى.

فاضل

:

(تحت الملاية يقوم بحركات تغيير ملابسه وصفية تدخل فى ضوضاء شديدة ومعها المصور ورجال الصحافة)

صفية

:

(تدخل وهى تحمل الميكرفون.. ومعها كاميرا مان.. وتنظر للملاية فى ذهول) صباح الخير يا بطل.

فاضل

:

مين اللى بيتكلم ؟

صفية

:

أنا صفية محمود مذيعة بالتليفزيون

عزمى

:

عزمى ابو جناح.. مدير المستشفى (يقدم نفسه إلى صفية)

صفية

:

أهلا وسهلاً .. خايفة خالص ومضطربة.

عزمى

:

ليه خير

صفية

:

قلبى بيدق تك تك تك (ومازالت تنظر لحركات فاضل تحت الملاية)

عزمى

:

ليه يا فندم.

صفية

:

علشان ح اقابل سيادة الريس.

عزمى

:

يا رب .. معقول  هذا الكلام .. الريس جاى

صفية

:

(وهى تشير إلى فاضل) ايه دا بيعمل ايه دا.

عزمى

:

دا بيستعد للقاء الرئيس

صفية

:

انا جسمى بيقشعر .. انا ح أعمل خبطة العمر.. ح أشوف الرئيس .

فاضل

:

(يرفع الملاية) خلاص.. أنا جهزت اهه.

 

:

(يرمى الملاية ونجده وقد ارتدى ملابس نظيفة إلى حد ما)

صفية

:

اهلا بالبطل.

فاضل

 

مين البنت الحلوة دى.

عزمى

:

دى صفية محمود مذيعة التلفزيون.

فاضل

:

مراتك.

عزمى

:

لا.

فاضل

:

حماتك

عزمى

:

لا.. قلت لك مذيعة التليفزيون

صفية

:

انا ح اعمل معاك حديث وندردش سوى يا بطل.

فاضل

:

وماله.. تعالى اقعدى جنبى ما دام هندردش.. تعالى اقعدى على السرير جنبى (يشير اليها بالجلوس)

صفية

:

ادينى قعدت اهه

فاضل

:

يلا ابتدى .. اسمى فاضل عبد السميع.

صفية

:

صور.. صور

فاضل

:

صور علشان امى تشوفنى فى كرداسة وتطمئن

طماطم

:

(تدخل وهى تمسك عصا فى يدها وبملابس المستشفى) فين جوزى يا فاضل.. انتم عايزين تمنعونى منه ليه هو مات .. يا عينى  يا عينى يا روح أمك

فاضل

:

طماطم .. مراتى.

صفية

:

أهلا يا طنط

طماطم

:

عيب عليكى .. احترمى نفسك.. طنط ايه يا روح أمك أنا طنط.. انا طماطم.. أصغر منك وأحلى ومنك.

عزمى

:

الست دى دخلت هنا إزاى.. عايز أفهم.

طماطم

:

دخلت على رجلى.. أنا عيانة فى المستشفى

عزمى

:

ممنوع زيارة الستات للرجالة فى المستشفى.

طماطم

:

ودى مش ستات (وتشير إلى صفية) انا جاية لجوزى.

عزمى

:

أنا مش عايز مشاكل.. الريس جاى كمان شوية ومش عايز قلق.

طماطم

:

ايوه.. انا عايزة رئيس المستشفى.

صفية

:

لا مش رئيس المستشفى الريس الكبير.. رئيس المستشفى الدكتور عزمى لكن الريس الكبير واحد تانى.

فاضل

:

عارفه الريس الكبير يا طماطم يعنى المشير.

عزمى

:

لا الكبير خالص.. مش المشير.

فاضل

:

خلاص عرفته رئيس الوزراء يا طماطم جاى يزورنا.

طماطم

:

يا سلام .. يا سلام وح أشوفه.

فاضل

:

وأنا ح ابوسه على خدوده وأقول نورت يا باشا

عزمى

:

أنا مش بتكلم عن رئيس الوزراء.. أنا بتكلم على الريس اللى فوق.. اللى فوق

فاضل

:

اللى فوق فوق قوى (يحتبس صوت فاضل)

عزمى

:

ايوه .. خد شويه ميه (يعطيه كوب ماء يشرب.. يتنفس فاضل)

طماطم

:

اللى بنشوفه فى التلفزيون الريس الريس.

صفية

:

ايوه الريس .. الريس (بقعة ضوء على فاضل وطماطم)

فاضل

:

الريس جاى يا طماطم .. الريس الكبير.

طماطم

:

ايوه يا فاضل (ترتعش وترتجف)

فاضل

:

ح أقوله يا طماطم.. ح أقوله على القراريط الثلاثة.. اللى خدهم منى العمدة ح أقوله على كل حاجة.

طماطم

:

ايوه يا خويا كلمه.. وقوله على اللى فى قلبك كله

فاضل

:

ح أقوله على الدار واللى عملوه فينا لحد ما خلونا نسيب الدار

عزمى

:

(يصيح وترجع الإضاءة كما كانت) لا مش حتقول أى شكوى

طماطم

:

امال حيقول إيه.

عزمى

:

حيقول احنا بخير يا ريس.. الحمد لله يا ريس أنا مبسوط يا ريس.. كله تمام يا ريس.. سامع.

صفية

:

ايوه يا عزمى احنا مش عايزين مشاكل وكل مشاكلك حنحلها بعد الريس ما يمشى (تدخل كوكى انتظرنى وحلمى أبو كارت وعسل الحسنى.. يحملون بوكيهات الزهور)

كوكى

:

صباح الخير

صفية

:

مش معقول الفنانة الشهيرة كوكى انتظرنى

كوكى

:

أهلا يا حبيبتى

صفية

:

أنا صفية محمود المذيعة بقناة إف إف

حلمى

:

حلمى أبو كارت مدير فندق النجوم الخمسة

عسل

:

عسل الحسنى ابن رئيس الحى.

صفية

:

دى فرصة سعيدة .. كلكم جايين علشان تقابلوا الأبطال

كوكى

:

ايوه طبعاً .. دول أبطالنا وأحبابنا

صفية

:

ايه هدف الأستاذ عسل الحسنى من الزيارة؟

عسل

:

دا واجب علينا.. كل بطل من ابطال حرب التحرير له دين فى رقبتنا

طماطم

:

يا سلام يا ولاد أنا فى حلم وألا فى علم

كوكى

:

كل بطل راجع له سهرة عندى فى الكباريه وح أرقص له.

طماطم

:

سامع يا فاضل حترقص لنا

حلمى

:

كل بطل له هدية عندى كارت الأحلام

عزمى

:

كل بطل له وسام من السيد الرئيس حيسلمهوله شخصياً.. الريس قال الأبطال أولادى مش خسارة كل واحد وسام.

صفية

:

(تتحدث مع الكاميرا) انساتى سادتى نحن فى حفل كبير ولقاء كبير بين السيد الرئيس وابنائه الأبطال ليمنح كل منهم وساماً.. أوسمه الأبطال.

طماطم

:

عاش الوسام

الجميع

:

عاش الوسام

(صوت عربات وصفارات رئاسة الجمهورية .. الكل يجرى.. هرج ومرج وفلاشر فى الإضاءة .. الكل يجرى ويهرول خارج المسرح صوت مارشات عسكرية ليظل على المسرح فاضل وطماطم فى بقعة الضوء.)

فاضل

:

بنت يا طماطم

طماطم

:

ايوه يا فاضل

فاضل

:

شكلى حلو يا بت

طماطم

:

قمر يا خويا قمر

فاضل

:

حنصور مع الرئيس واخد منه الوسام

طماطم

:

قولي يا فاضل

فاضل

:

نعم يا روح قلب فاضل

طماطم

:

هو الوسام دا حنعمل بيه ايه (موسيقى مؤثرة تدل على قلقه)

فاضل

:

الوسام نعمل بيه ايه (يفكر) الوسام دا يا بنت زى خاتم سليمان.. زى مصباح علاء الدين والعفريت اللى فيه عارفاه.. يقولك شبيك لبيك أنا بين إيديك.

طماطم

:

أيوه عرفاه.. مصباح علاء الدين اللى يطلب كل حاجة يلبيها.

فاضل

:

اهو الوسام اى حاجة حتطلبيها حتلاقيها.

طماطم

:

يا حلاوة يا خويا

 

:

(ضوء سبوت على فاضل وطماطم)

 

:

(صوت دقات الساعة .. سبوت عليها .. مع صوت مخيف)

طماطم

:

ما حدش جه يا فاضل.. وفاتت ساعة

فاضل

:

(لا يرد)

طماطم

:

فاضل

فاضل

:

(لا يرد)

طماطم

:

انت مت يا فاضل.

فاضل

:

لا ما متش.

طماطم

:

أمال ما بتردش عليا ليه.

فاضل

:

ارد على ايه .

طماطم

:

فات ساعة يا خويا وما حدش جه.

فاضل

:

اسمعى يا فاطمة.. أنا لازم اكلم الريس أيوه مش هو المسئول عن كل حاجة فى البلد لازم أكلمه.

رجل الأمن

:

(يظهر رجل أمن من تحت السرير) لا مش وقته.

طماطم

:

أنت طلعت منين يا لطيف.. أعوذ بالله.. اشتاتا اشتوت.

رجل الأمن

:

طلعت من تحت الأرض.. أنا أمن دولة يا بت مش عفريت.

طماطم

:

فيه ايه.. يا أمن الدولة انت عايشين تحت الأرض كمان.

رجل الأمن

:

حتقول للريس الحمد لله يا ريس.. كله تمام يا ريس.. سامع (ويهدده فى حركاته) واذا ما سمعتش الكلام ح أذيك ابره وهتموت فى الحال.

فاضل

:

سامع.. سامعه بلاش الإبره يا عم ح أقول اللى انت قلته (يخرج ابره كبيرة الحجم بها هواء)

 

:

(صوت ضوضاء ودخول بعض الرجال.. يدخل الدكتور عزمى مع ضابط كبير من القوات السملحة.

عزمى

:

اتفضل .. اتفضل سعادتك.

فاضل

:

(ينحنى ويتحدث ورجال الأمن بينه وبين طماطم) أهلا يا ريس.

طماطم

:

الحمد لله يا ريس.

فاضل

:

احنا مبسوطين يا ريس.

كل شئ عال العال والجسر فى بلدهنا والعمده عال العال.

طماطم

:

كله تمام يا ريس (ينظران إلى رجل الأمن) كله تمام انبسط قلت كل حاجة.

فاضل

:

كله تمام.. اتبسطت قلنا كل اللى قلته قدام الريس.

عزمى

:

يا ابنى دا الفريق

فاضل

:

فريق ايه ؟

عزمى          

:

نيابة عن السيد

فاضل

:

نيابة ايه هو احنا قلنا حاجة غلط لا سمح الله.

طماطم

:

هو احنا قلنا حاجة غلط؟

عزمى

:

دا الفريق ابو منصور نيابة عن السيد الرئيس

فاضل

:

هو انا تايه عن الريس.. دا انا عارفه وشايفه كل يوم فى التليفزيون.. تقولى الريس الكبير جاى.. الريس الكبير جاى.

طماطم

:

دا مش هو الريس

عزمى

:

دا الفريق.. الفريق ابو منصور

طماطم

:

هو احنا حنلعب كوره.. فريق ايه.. انت قلت الريس

فاضل

:

جابيلنا واحد مزور

طماطم

:

ايوه دا مش هو

عزمى

:

الريس حيتصور معاكم يا فاضل.. والفريق حيسلمك الوسام نيابة عن الريس.

طماطم

:

انتم قلتم الريس جايب لنا واحد تانى عيش البط الأول وبعدين البط

عزمى

:

يا عسكرى فاضل استلم الوسام ويلا بسرعة علشان تتصور مع الريس

فاضل

:

اضحك عليا يا خويا.. عايزين اروح له هناك

صفية

:

يا أخ فاضل الريس هنا

فاضل

:

فين .. فين ؟

الفريق

:

خد يا ابنى الوسام حطه على صدرك (يضع الفريق الوسام على صدر فاضل) واتفضل معايا علشان تتصور مع الريس.

فاضل

:

(ينظر للوسام .. طماطم تزغرد) ودونى الحمام الأول ركبى مش شيلانى حشوف الريس.

 

:

(يحملونه للخارج.. وطماطم تزغرد خلفه وتظل صفية)

 

:

(بقعة ضوء مع إظلام المسرح)

صفية

:

عزيزى المشاهد .. إنها لحظة تاريخية أن يلتقى الأبطال بقائدهم وقائد مصر والقائد الأعلى للقوات المسلحة (تجرى خارج المسرح)

نهاية الفصل الأول

 

 

الفصل الثانى

اللوحة السادسة

 

:

(يفتح الستار على مكتب المدير حلمى أبو كارت)

المدير

:

(وقد جلس يتحدث فى الهاتف) ايوه يا سعادة الباشا.. احنا كلنا تحت أمرك يا باشا.. ايوه فى أجهزة كل حاجة.. اطمئن يا باشا .. مع السلامة.

(يضع السماعة .. يدخل بليه الفراش)

بليه

:

يا سعادة الباشا

المدير

:

فيه ايه .. عايز ايه .. اتكلم.

بليه

:

(وهو يرتجف) الواد فاضل عبد السميع

المدير

:

فاضل مين ؟

بليه

:

الواد بتاع السويتش اللى كان فى الترنك.. بتاع القنبلة والأميرة قوت القلوب وسافر لحرب التحرير فاكره

المدير

:

مات.. يا حول الله يا رب الله يرحمه.. خلاص حنعمله قائمة باسمه وألا أقولك نسمى صالة الكازينو باسمه

بليه

:

فاضل ما متش واقف بره ومعاه مراته

المدير

:

روح جتك الغم وأنت ما وركش غير الأخبار المنيلة والمشاكل.. عايز ايه ؟

بليه

:

بيقول جاى من طرف الريس

المدير

:

(يهب واقفا) من طرف الريس.. خليه يتفضل

بليه

:

اتفضل يا اخ فاضل.. اتفضلى يا طماطم

 

:

(يدخل فاضل وطماطم فى يده الوسام وفى يدها الجريدة)

المدير

:

يا أهلا وسهلا.. يا أهلاً وسهلاً.. اللى طرف الريس

فاضل

:

اهلا بك يا سعادة المدير.

طماطم

:

احنا جايين لك زى ما وعدتنا.. تدى فاضل الهدية

المدير

:

هديه ايه ؟

طماطم

:

هدية الأميرة قوت القلوب .. (يرتبك المدير ويلعب فى الكرافتة)

المدير

:

آه الهدية.. انهو هديه.

طماطم

:

شقة وعربية..

المدير

:

شقة وعربية أنت اتجننت.. شقة وعربية

فاضل

:

بلاش شقة وعربية.. شقة بس وارجع الشغل.

المدير

:

ترجع الشغل يا ابنى احنا عينا راجل عنده اتناشر عيل.. عمك ابو سالم والعيال كلهم وأبوهم ساكنين فى مساكن الإيواء.. اطرده علشانك.

طماطم

:

بلاش السويتش أى شغلانة تانية .. كابتن

المدير

:

تمانية مليون شاب عاطل فى البلد من حملة الشهادات .. مهندسين وأطباء وخريجين حقوق.. أسيبهم لمين؟ مش دول امانة فى رقبتى.

فاضل

:

هى جات عليا.. مش أنا البطل بتاعكم .. أنا بتاعكم وما قلتش حاجة بس الريس قال لى أى حاجة تعوزها.

المدير

:

الريس قالك (يسخر منه) الريس قالك أنت ايه الأمارة.

فاضل

:

أمارة ايه ؟ انت ما شفتش التليفزيون

المدير

:

لا

طماطم

:

ما شفتش الجرايد

المدير

:

لا

طماطم

:

(تخرج الجريدة) خد بص (تقدم له الجريدة)

المدير

:

ايه دا

طماطم

:

صورة فاضل مع الريس (تشير له) بص.

المدير

:

ورينى كده.. أنت فين ؟

فاضل

:

أنا اهه (يشير إلى الجريدة)

المدير

:

ورينى كده.. أنت فين؟

فاضل

:

فين (ينظر ) مش شايف

طماطم

:

بص كويس يا باشا.. تعالى يا واد يا بليه بص

بليه

:

(يدخل وينظر إلى الجريدة) أنا شايف الريس اهه

طماطم

:

ودا فاضل

فاضل

:

(يضحك) ايوه انا

المدير

:

دا اسمه نصب واحتيال (يضرب بيده المائدة) انا ح اتصل بالشرطة حالاً ازى تاخد صورة الريس مع قيادات الجيش والأبطال وبتاجر بيها

طماطم

:

عيب عليك .. عيب عليك يا باشا.. انت عارف فاضل.

فاضل

:

أنا برضه يا حلمى بيه يا ابو كارت.. اعمل كده

المدير

:

جايب لى جورنال

فاضل

:

طيب بص الوسام اهه (يخرج الوسام)

المدير

:

وسام ايه يا ولد (يمسكه بذهول)

فاضل

:

وسام يعنى نيشان

طماطم

:

يعنى مصباح علاء الدين.. تدعكه كده يطلع لك واحد يقولك شبيك لبيك عبدك بين ايديك.. مش كدا يا فاضل.

المدير

:

طيب ادعكى يا فاطمة الوسام وقولى له يجيب لك شقة وألا عربية.. بلاش شقة وعربية خليها شقة بس

فاضل

:

عيب عيب يا حلمى باشا.. دا أعلى تقدير من الدولة

المدير

:

دولة مين ؟

فاضل

:

مصر.

المدير

:

مصر القديمة والا الجديدة.

فاضل

:

يلا يا طماطم احسن دمى بدأ يفور

المدير

:

أوكيه وقتك خلص يا بنى.. انت فاكر نفسك مين؟

طماطم

:

دا فاضل بوش.

المدير

:

فاضل بوش.. إزاى .. أمك الله يرحمها كانت رايحه جاية على أمريكا

طماطم

:

(لفاضل) الراجل دا زودها خالص.. لازم أحط الوسام قدام عنيه وأقوله خد روحه.

فاضل

:

اعمليها يا بنت.

طماطم

:

(تحرك الوسام أمام المدير) موت الراجل يا وسام.. ادبحه .. عوره أعمل أى حاجة فيه .

المدير

:

انت بتعملى ايه يا بنت يا مجنونى.. بليه بليه

بليه

:

ايوه يا باشا

المدير

:

طلع الناس دى بره

طماطم

:

الوسام ما بيعملش حاجة يا فاضل.. العفريت باين هرب منه

فاضل

:

هرب ازاى يا بنت.. اعملى تانى كمان مره

طماطم

:

أعمل ايه ؟

فاضل

:

ادعكي الوسام

طماطم

:

(تدعك الوسام) اهه يا خويا عماله ادعك

بليه

:

يلا يا فاضل انت وطماطم

فاضل

:

انا عايز هديتى.. الشقة والعربية .. طب شغلة الكابتن

المدير

:

طلع الولد دا بره.. ابن بوش.

فاضل

:

حرام عليك اروح فين ؟

المدير

:

شوف لك عربية بطاطا اسرح بيها.. وألا افتح لك كشك .. اتفضل اطلع بره

فاضل

:

مش طالع

المدير

:

هاتوا الأمن.. الامن (يدخل رجال الأمن ويحملوا فاضل وطماطم)

فاضل

:

حقوقى .. حقوقى

طماطم

:

يا ظلمة.. يا كفرة

 

:

(ضوضاء مع خروج المجموعة .. تحمل فاضل وطماطم)

إظــــــــــــلام

 

 

اللوحة السابعة

 

:

(يفتح الستار على كشك سجاير على رصيف وقد علق عليه الوسام وصورة فاضل.. الراديو ينبعث منه أغنية .. بعض الصحف علقت.. بعض الحلويات .. كتب على الكشك "كشك البطل" فاطمة تقف مع عبده)

طماطم

:

(تنادى) عندنا الحلويات والسجاير

عبده

:

قرب قرب حلويات وسجاير

طماطم

:

إحنا متشكرين قوى يا سى عبده تعبناك معانا

عبده

:

تعبك راحة يا ست فاطمة.. إنتى زى أختى والأخ فاضل زى أخويا.

طماطم

:

والله فاضل عمال يشكر فيك.

عبده

:

فاضل دا بطل.

طماطم

:

ما هو أنت كمان مش بتقول عديت القنال فى حرب 73؟

عبده

:

مظبوط

طماطم

:

وايه اللى شغلك بواب.. لا مؤاخذه يعنى

عبده

:

اصل أنا بعد ما جيت من الحرب كافئونى وعينونى فراش

طماطم

:

يا عينى يا خويا... إزاى ؟

عبده

:

فراش يعنى موصلاتى .. يوصل الورق من مكتب لمكتب.

طماطم

:

فهمت ودى الشغلانة اللى لقيتها لك الحكومة؟

عبده

:

هو فين س فاضل؟

طماطم

:

راح يشترى شوية بسكويت للولاد.

محروس

:

ايه دا.. ايه دا.. (يدخل المسرح) قدام عمارتى انا وعلى الرصيف اللى قدامى يتعمل كشك حقير.

طماطم

:

كشك البطل.. يا افندى يا عديم النظر

محروس

:

مين البنت دى ؟ يا عبده؟

عبده

:

دى (وهو مرتبك)

طماطم

:

أنا فاطمة

محروس

:

فاطمة مين بنت مين؟

طماطم

:

فاطمة.. فاطمة بنت ابوك سالم ابو سليمان.

محروس

:

ابو سالم ابو سليمان ما اعرفهوش

طماطم

:

يا نهارك مش فايت أنت ما تعرفهوش مع إنى بشبه عليك شفتك فين شفتك فين ؟

محروس

:

عبده

عبده

:

صباح الفل .. صباح الخير يا سعادة البيه

محروس

:

صباح الزفت.. صباح الهباب.. الكشك دا جه هنا ازاى؟ ومين بناه ؟

طماطم

:

اتبنى إمبارح .. بنيته أنا وفاضل وأخوك عبده.

محروس

:

أخويا عبده (يتأفف) عبده

عبده

:

نعم يا سعادة الباشا.

محروس

:

ازاى تعمل العاملة المنيلة دى؟

طماطم

:

الله الله إنت داخل فينا شمال كده ليه ؟

محروس

:

إزاى تعمل الكشك دا هنا؟

طماطم

:

ما أنا قلت لك.. عملته أنا وفاضل وسي عبده

محروس

:

يا سلام

طماطم

:

الله يسلمك

محروس

:

وبعدين

طماطم

:

راجل شهم .. بطل حرب اكتوبر

محروس

:

والله

طماطم

:

الله يخيبهم عينوه فراش بعد ما عدا القنال ومشى وسط النار وقتل كام واحد من الأعداء عينوه فراش.. أنت مش عارف يعنى ايه فراش.. فراش يعنى موصلاتى ورق وحاجات بين المكاتب.. حسره عليك من فراش لبواب.. شفت الأبطال فى بلدنا بيشتغلوا ايه بعد الحرب فراشين .. يا بوابين وأنا فاكره لما كنا فى الحرب وصغيرين نقوله ابنك يقولك يا بطل هاتلى نهار.. كنا نقول عليهم أبطال مصر ونشوفهم فى عربيات ونصفق لهم وبعد ما ينزلوا من العربيات نديهم الوظيفة فراش وبواب وكمسرى دا كلام!

محروس

:

انتى بتدينى محاضرة سياسة الكشك دا يا عبده بتاع مين؟

طماطم

:

فاضل

محروس

:

فاضل مين ؟ يطلع ايه ؟

طماطم

:

عندك أوعى تغلط فى جوزى انا عارفاك

فاضل

:

(يدخل) سلاموا عليكم.. (ينظر إلى محروس) فيه ايه ؟ مش معقول الأستاذ الكبير محروس شعللها.

محروس

:

انت تعرفنى؟

فاضل

:

الأستاذ الصحفى محروس شعللها.. أنا يا أستاذ أشد المعجبين بيك .. أنت يا أستاذ معروف.. أنا كل يوم اشترى الجورنال فى حرب التحرير علشان أقرأ مقالاتك وكل يوم أشوفك فى التليفزيون حتى بالأمارة عندك عشرين بدله محترمه من اللى هى .. صح ؟

محروس

:

شكراً يا بنى (يعطيه جنيه)

فاضل

:

متشكر .. وألا كلامك اللى بينقط سكر.. علم فهم حداقة مفهومية.. الأستاذ محروس شعللها.. دا كان حلمى أشوفك من زمان

طماطم

:

يا سلام.

محروس

:

خد يابنى الجنيه دا كمان

فاضل

:

ربنا يخليك

طماطم

:

ايه دا انت بتاخد منه فلوس ؟

فاضل

:

ايوه اخد منه .. دا حبيبى.. حبيب الناس .. أه دا الأستاذ محروس شعللها.

طماطم

:

يعنى ايه محروس شعللها ؟ يطلع ايه يعنى.. حتة جورنالجى لا راح ولا جه.

فاضل

:

اخرسى.. (يضربها)

طماطم

:

بتضربنى علشانه ؟

محروس

:

برافوا عليك انت يا ولد كويس خد كمان جنيه

فاضل

:

لا (ثم يأخذه)

محروس

:

أنت وعبده شيل الكشك دا من هنا

فاضل

:

كشك ايه ؟

محروس

:

بتاع الست دى.

فاضل

:

دا مش بتاعها

محروس

:

ايوه عارف عارف بتاع

عبده

:

(لمحروس) يا سعادة الباشا سيب الكشك للناس الغلابة.

محروس

:

مش حتنفع تشتغل بواب بعد ما ضحكت عليك الست دى بكلمتين الولد دا كويس قوى (يشير إلى فاضل) ينفع يشتغل بدالك يا عبده.

طماطم

:

وكمان حيشغلوك بواب

محروس

:

انا حر أشغله زى ما أنا عايز

طماطم

:

بواب بدل عبده .. الراجل الطيب

محروس

:

وانتى مالك الولد دا ممتاز وأشغله زى ما أنا عايز

فاضل

:

وانتى عارفه لولا المقالات وأحاديث الأستاذ شعللها ما كنتش الحرب قامت.. الأستاذ شعللها دا.. هو اللى كنا بنفتح عينينا عليه فى الجرايد وننام وصورته وصوته فى ودننا.. دا صاحب مقالة أضربهم يا بوش وريحنا.

محروس

:

خد كمان جنيه يا ولد مش خسارة فيك.. أنت ولد كويس حافظ مقالاتى كويس .. يلا

فاضل

:

يلا ايه؟

محروس

:

شيل الكشك.

فاضل

:

انت بتهزر

محروس

:

لا مبهزرش

فاضل

:

والكشك تاعبك فى ايه بس؟

طماطم

:

اسأله .. اسأل الأستاذ شعللها

فاضل

:

الكشك دا وهو هنا بيوجعك يعنى؟ بيقرصك فى حاجة.؟

محروس

:

أنا ساكن فى حى راقى فى شارع هادئ الكشك حيلم الولاد الصيع

فاضل

:

مش أنا اللى ألم صيع يا بيه أنا راجل على باب الله

محروس

:

وأنت ايه اللى دخلك فى الموضوع.. شيل الكشك أنت وعبده.

عبده

:

يا باشا

فاضل

:

يا أستاذ شعللها الكشك دا بتاعى أنا.

محروس

:

بتاعك انت.. بتاعك انت يتشال

فاضل

:

انت بتهزر ولا بتتكلم بجد؟

محروس

:

بتكلم بجد طبعاً

فاضل

:

هو الشارع دا لا مؤاخذة بتاع أبوك.. اسمه شارع شعللها؟

محروس

:

احفظ أدبك

فاضل

:

(بصوت عالى) الشارع دا بتاع الحكومة صح ولا لأ.

محروس

:

ايوه بتاع الحكومة

فاضل

:

انا بقى ابن الحكومة

محروس

:

ابن مين يا ولد انت؟

فاضل

:

ابن الحكومة مش كنت بتذيع فى الراديو ولادك يا مصر حيحرروا الأوطان.. بعد كل حديث لك

محروس

:

ايوه دا كلام الراديو زى ما بيذيع الأغانى

فاضل

:

انا بقى صدقتك وصدقت الراديو

محروس

:

خللى الراديو يديك تصريح بقى

فاضل

:

الراديو يدينى تصريح ؟

محروس

:

ايوه الراديو اهه (يشير إلى الراديو) الراديو اهه خليه يديك تصريح 

فاضل

:

انت سخن ولا جرى لك حاجة فى مخك.. خد التلاتة جنيه اللى عطيتهملى.

محروس

:

أربعة جنيه

فاضل

:

يا لئيم حافظهم يا شعللها.. خد الجنيه الرابع اهه.

محروس

:

الشارع ممنوع يتعمل فيه كشك إلا بتصريح من الحكومة

طماطم

:

التصريح اهه (تقدم الوسام)

محروس

:

ايه دا ؟

طماطم

:

مش عاجبك .. بص كمان (تقدم له الجريدة)

محروس

:

ايه دا وسام وجورنال ايه .. أنا بسألك فين التصريح؟

طماطم

:

دا احسن من التصريح

محروس

:

(يفتح المحفظة) خد يا بنى عشرة جنيه وشيل الكشك دا من هنا.

طماطم

:

لا بقى إحنا مش ماشيين احنا قاعدين فى ملك الحكومة

محروس

:

ما تخلنيش استعمل القوة معاك (يهدده بضربه بالقدم)

فاضل

:

حتضربنى إكمن رجلى وجعانى ومتصابه.. لا وحياتك أنا أقدر أضربك

طماطم

:

والله اللى حايمد ايده علينا حنفرجه

محروس

:

يا عبده اتصل بالبوليس

عبده

:

معلش يا سعادة الباشا

محروس

:

اتصل بالبوليس قولهم محروس شعللها بيقول لكم تعالوا فوراً.

عبده

:

معلش يا باشا

محروس

:

خليه ينقل الكشك من قدام عمارتنا فى الشارع التانى.

فاضل

:

واشمعنى يعنى شارعكم دونا عن الشوارع.. على راسه ريشه

طماطم

:

دا احنا قلنا الشارع دا هادى وحلو

موظف 1

:

(يدخل) صباح الخير.. فين صاحب الكشك دا؟

فاضل

:

انا

طماطم

:

انا

موظف 1

:

انتم الاثنين ؟

معاً

:

ايوه

محروس

:

اطردهم من هنا يا حضرة.. انا محروس شعللها الصحفى السياسى

موظف 1

:

معرفكش

محروس

:

ما بتقراش جرايد؟

الموظف

:

لا

محروس

:

بتشوف تليفزيون

الموظف

:

لا

محروس

:

انت مين ؟

الموظف 1

:

انا مندوب مكتب العمل.. مين العمال اللى عندكم

فاضل

:

عمال ايه ؟ انت شايف إن احنا عندنا كافيتريا ولا مطعم.. دا كشك

طماطم

:

شوف يا خويا .. دا الوسام .. خده جوزى فاضل.. خده من الريس دا بطل حرب التحرير

فاضل

:

ودا عبده بطل حرب اكتوبر ضرب خمسين دبابة

عبده

:

اهلا وسهلا

فاضل

:

(للموظف) وأنت؟

الموظف

:

انا بطل الإنسحاب

فاضل

:

نعم

الموظف

:

انا انسحبت سنة 56 وانسحبت سنة 67 واتزنقت فى الثغرة سنة 73

محروس

:

الحرب خلصت خلاص والسلام جه والنظام العالمى لازم يسود المجتمع

الموظف 1

:

اسم صاحب العمل؟

طماطم

:

فاضل عبد السميع

الموظف

:

مخالفة عن عدم وجود رخصة ومخالفة لأنك مش معلق ميعاد فتح الكشك وغلقه.

طماطم

:

ايه دا كل دى مخالفات ؟

الموظف 1

:

ما هو أنا ما انتصرتش زيكم لازم انتقم منكم.. ومخالفة للصحفى محروس شعللها .. سلاموا عليكم (يخرج)

طماطم

:

المخالفة دى معناها إننا مع الحكومة

محروس

:

شوف يا بنى الحكاية مش سهلة تفتح كشك فى شارع وخاصة الشارع اللى انا ساكن فيه.

فاضل

:

يا سلام يا أخى اشمعنى الحكاية كانت سهله وأنا بحارب وأضرب. كنت انت فين لما كنت أنا هناك على يمينى صحراء وعلى شمالى صحراء وقدامى صحراء.. وورايا صحراء.. أنت كنت فين يا أستاذ شعللها قاعد فى التليفزيون تقول أضرب يا أخى.. حارب يا أخى.. إنها حرب التحرير وقاعد فى التكييف وعربيتك مكيفة هه أنطق.. كانت سهلة ليك

محروس

:

كله بيحارب فى موقعه

طماطم

:

يعنى ايه كل فى موقعه.. بتحارب فين حدد ؟

محروس

:

كنت بحارب بقلمى.

فاضل

:

تحارب بقلمك .. يا لئيم وأتارينى وأنا قاعد فى الحرب شايف طيارات بتقع من السماء.. اقول ايه دا يا ولاد الطيارات دى واقعة كده ليه يقولولى من قلم الأستاذ محروس شعللها

محروس

:

إنت بتألس يا ولد.. أنا ح أوريك أنا ح أفرجك (يخرج)

عبده

:

(يجرى خلفه) يا أستاذ محروس .. استنى بس شويه.

طماطم

:

ما تقولش ولد

(يدخل موظف 2)

موظف 2

:

فين صاحب الدكان؟

فاضل

:

انا.

موظف 2

:

فين الميزان؟

فاضل

:

ميزان ايه ؟

موظف 2

:

مش أنت بياع .. يبقى لازم عندك ميزان.

طماطم

:

لامؤاخذة يعنى حضرتك مين؟

موظف 2

:

انا من وزارة التموين.

فاضل

:

يا ولد .. وزارة التموين قاعدة للميزان بتاعى انا اشمعنى رغيف العيش وزنه مش سليم صح.. باكو الشاى وزنه مش سليم صح.. أنا بقى شايف إن وزارة التموين تدى لكل واحد ميزان يوزن بيه حاجاته.

موظف 2

:

ميزانك فين ؟ طلعه من غير استعباط؟

فاضل

:

يا جدع أنتا ما عنديش ميزان

طماطم

:

ما عندناش ميزان يا خويا لأننا ما بنبعش حاجة بميزان.. ومش محتاجين ميزان

موظف 2

:

لا .. أنتم حتحتاجوا لميزان أكيد.. كل دكان لازم يكون عنده ميزان

طماطم

:

يا خويا .. شوف لنا ميزان بمعرفتك نشتريه منكم

موظف 2

:

إمسكى (يسجل ورقه) دى مخالفة علشان تدفعوها لأن ما عندكمش ميزان (يخرج .. يدخل محروس وعبده)

محروس

:

بلغت بوليس المرافق العامة زمانهم جايين

عبده

:

بتوع الإزالة.. يابنى زمانهم جايين امشى

شرطى

:

(يمر وهو يسير) سلاموا عليكم

محروس

:

يا شاويش .. يا شاويش

الشرطى

:

نعم.

محروس

:

هد الكشك دا .. هده حالا

الشرطى

:

نعم بتقول ايه سعادتكم؟ أنا ما ليش دعوه بالهد.. أنا رايح فى مأمورية

محروس

:

بقولك هد الكشك دا واقبض على الجدع دا.

طماطم

:

اقبض عليه يا شاويش

فاضل

:

الراجل دا فاكر نفسه فوق الحكومة.

طماطم

:

الراجل دا شايف نفسه يا شاويش

فاضل

:

اقبض عليه وحلاوتك عندى

الشرطى

:

بس انت وهو هى انا عايز افهم الحكاية ايه ؟

عبده

:

الحكاية بسيطة يا عم نوفل

الشرطى

:

ما دام بسيطة يبقى أنا ماشى.

محروس

:

استنى عندك

الشرطى

:

(يؤدى التحية) تمام يا افندم حضرتك لواء؟

محروس

:

لا .. لا لواء ولا ضابط.. أنا محروس شعللها

فاضل

:

طز فى الدنيا العجيبة

محروس

:

انت بتشتمنى وتقول طز؟

فاضل

:

باقول فى الدنيا العجيبة

الشرطى

:

وبعدين عايز افهم ايه الحكاية ؟

طماطم

:

افهمك انا يا خويا.. شايف الوسام دا؟

الشرطى

:

يا حلاوة ماله الوسام دا

طماطم

:

دا بتاع فاضل.

فاضل

:

انا.

الشرطى

:

يا حلاوة

طماطم

:

واخده اخوك فاضل من السيد الرئيس بطل حرب التحرير.. شايف الجورنال دا.. دى صورة فاضل مع الرئيس

الشرطى

:

(يمسك الجريدة) يا ألف مبروك.. ألف مبروك يا فاضل.. عقبالى يا ولاد.. (يحضنه) مبروك يا خويا.. ألف مبروك وسام وصورة وصورة مع الريس .. دا أهو دا.. ألف مبروك

فاضل

:

الله يبارك فيك ويديلك واحد زيه

الشرطى

:

اهو نفسى أنا فى وسام زى دا وصورة زى دى والنبى علشان الواحد كده يعتز قدام ولاده وأحفاده

محروس

:

أنتم حتتصاحبوا وتتفقوا عليا وألا ايه ؟ أنا بقولك هد الكشك عليه حالاً

الشرطى

:

معاك أمر إزالة يا بيه؟

محروس

:

الواد دا ما عهوش رخصة

فاضل

:

معايا مخالفة رخصة دا يعنى رخصة

محروس

:

الواد دا مخالف شرط الحى والمحافظة والقاهرة الكبرى

فاضل

:

بقيت أنا مشكلة القاهرة الكبرى

محروس

:

وأى حاجة حتتسرق يبقى هو المسئول.

طماطم

:

أنت اللى حرامى لأنك سرقتنا بكلامك.

محروس

:

اخرسى.. أنا مش هخليكم هنا دقيقة واحدة بعد كده.. أنا حاتصل بوزير الداخلية حالاً وراجع (يخرج .. يخرج عبده)

عبده

:

يا سعادة الباشا كفاية .. تعالى.

فاضل

:

(للشرطى) وزير الداخلية صاحبى.. ايوه صاحبى سلم عليا لما كنت مع الريس وقال لى رفعت راسنا يا فاضل وطبطب عليا .. اى والله نطق اسمى على لسانه.. دلوقت حيتصل بيه.. حيقوله عايز ايه يا محروس حيقول فاضل عبد السميع حيقوله فاضل دا بطل التحرير اتكسف يا محروس ومالكش دعوة به.. أنا الوزير وبقولك اتكسف اهه وحيرجع مكبوس.

الشرطى

:

ابقى قوله يا فاضل على مشكلتى

فاضل

:

انت عندك مشكلة فى الوزارة

الشرطى

:

ايوه

فاضل

:

قولى متتكسفش الوزير دا حبيبى

الشرطى

:

انا بقالى تلاتين سنة خدمة ما اخدتش فيهم ترقية ابقى صول وقاعد زى ما انا

فاضل

:

بسيطة نخليك صول .. دا حبيبى .. شوف صورته اهى واقف معانا ومع الريس كلنا مع بعض كلنا أبطال.. المواطن والوزير والريس فى الصورة.

الشرطى

:

(صوت سيارة النجدة) عربية النجدة وصلت

فاضل

:

تلاقى الوزير باعت لى.. مش كده يا فاطمة

طماطم

:

انت يا خويا بطل الأبطال.

الضابط

:

(يدخل ضابط شرطة النجدة ) هو فين ؟

فاضل

:

(للشرطى) قول له يا عم نوفل وفهمه.. أنا مين ؟

الضابط

:

فيه ايه يا عسكرى ؟

الشرطى

:

تمام يا فندم

الضابط

:

هو فين ؟

الشرطى

:

أهه (يشير إلى فاضل)

الضابط

:

انت يا ولد.. ايه حكايتك بالضبط ؟

فاضل

:

رد عليه يا عم نوفل ما هو الضباط مهزأنكم على طول.. رد

الشرطى

:

اصل الحكاية يا فندم

الضابط

:

اخرس أنت أنا بسأله هو .. انت ايه حكايتك يا ولد.. ومين البنت دى؟

طماطم

:

ما تقولش بنت أنا ست الستات فاطمة مرات البطل فاضل عبد السميع ما تقولش يا واد.

فاضل

:

سامع ما تقولش يا واد انا بطل

الضابط

:

بطل فى ايه بالصلاة على النبى

طماطم

:

بطل حرب التحرير واخد وسام من الريس .. اهه الوسام اهه

 

:

(يدخل محروس وعبده)

محروس

:

(يحدث الضباط) يا حضرت العميد الواد دا لازم يمشى والكشك دا لازم يتهد حالاً.

الضابط

:

اسمع يا ولد.. انت معاك رخصة من الحى

فاضل

:

لأ.

الضابط

:

معاك رخصة من البلدية؟

فاضل

:

معايا الأكبر من دول.

الضابط

:

معاك ايه .. ما تقوليش الوسام والجرنال.

فاضل

:

معايا ربنا

الضابط

:

ربنا معانا كلنا.. ما بهزرش معاك؟

فاضل

:

انت بتغير منى ليه .. حاقد عليا ليه.. حاسدنى ليه.. انت أخدت وسام الريس

الضابط

:

لا.

فاضل

:

اتصورت مع الريس

الضابط

:

لأ

فاضل

:

حاربت مع الدول الصديقة والدول الشقيقة

الضابط

:

لأ

فاضل

:

أمال أنت حاطط نأرك من نئرى لهي زى جورج سمبو ؟

الضابط

:

مين جورج سمبو؟

فاضل

:

دا عسكرى امريكانى.. كان هناك معايا بيقولى اديك سيجارة أمريكانى واديك على قفاك.. قلت له يا جورج أديك أنا على قفاك وتدينى سيجارة امريكانى.. وكان ساعات يقولى روح عدى من فوق اللغم دا واديك عشرة دولا.

الضابط

:

يا بنى دى أوامر عندى ماليش دعوة بيك.

محروس

:

الضابط عامل كبسه عليك

فاضل

:

كبسه (يضحك) كبسه عارفها.. دى رز ولحمة كانوا بيأكلوها لنا هناك كل يوم رز ولحمة ويقولوا كبسه.. تكبس بايدك مفيش تفاهم أما الواد جورج سمبو كان ياكل اشى هامبورجر واشى حاجة ساقعة ودايما يدلعوه الولد سامبو الأمريكانى دا.. ياخد اكله يدهولى ما يشربش الا سجاير اجبنى وياكل أكل اجنبى حتى كلامه اجنبى.

الضابط

:

انا اسف يا سى .. اسمك ايه ؟

فاضل

:

فاضل عبد السميع

الضابط

:

انا اسف يا فاضل ح اضطر اهد الكشك اللى عامله

محروس

:

فوراً أرجوك فوراً.

فاضل

:

محروس شعللها قال فوراً هد الكشك.. مش انت اللى كل يوم فى التلفزيون تقول اضربوهم .. ياللا اضربوهم يلا يا جنودنا يا أبطال.. فوراً .. كل حاجة مشعللها.. مشعللها فى الهد بره وجوه

الضابط

:

انا مضطر اهد الكشك لم حاجتك

فاضل

:

انا عايز أمى تجينى .. امى تجينى تدينى حقى.. قبل ما تهد

الضابط

:

أمك مين يا ولد ؟

فاضل

:

الشرعية الدولية

الضابط

:

فيه واحدة اسمها الشرعية الدولية

فاضل

:

الأستاذ محروس شعللها كان بيقول فى التلفزيون يا جنودنا يا أبطال مصر أمكم الشرعية الدولية.. وأبوكم النظام العالمى الجديد.. صح.

محروس

:

الواد دا هزاره دمه تقيل وزودها خالص

الضابط

:

يا فاضل انا مضطر للأسف أهد الكشك ابتعد واحد اتنين تلاتة

 

:

(يهجم الجنود مع بلاك أوت لهدم الكشك)

 

 

اللوحة الثامنة

 

 

:

(يتغير الديكور إلى مبنى التلفزيون من الخلف باب التلفزيون الخارجى.. تقف صفية محمود المذيعة وأمامها كاميرا وتمسك ميكرفون )

صفية

:

عزيزى المشاهد نحن الآن فى برنامج من غير مناسبة والكاميرا فى الشارع على باب التلفزيون.. ممكن نلتقى بأى حد دلوقتى من  الفنانين المعروفين ونسأله رايح فين وأخباره ايه ؟

 

كوكى

:

(الراقصة تمر بسرعة) صباح الخير

صفية

:

مدام كوكى.. مدام كوكى الفنانة المعروفة.

كوكى

:

صباح الخير .. ازيك يا حبيبتى برنامجك كان جميل القهوه الشعبية مش كده؟

صفية

:

لا القهوة الشعبية مش بتاعى

كوكى

:

يقطعنى قصدى نادى السينما

صفية

:

مش بتاعى برضه

كوكى

:

يقطعنى .. كنت فاكراه هو.. معلش اصلى فتحت كازينو جديد فى شارع الهرم.. وجايه ادعى زملائنا الفنانين وطبعاً أنت مدعوه

صفية

:

كده حيبقى اعلان يا مدام كوكى.

كوكى

:

انتى ليه عملتيه اعلان يا حبيبتى.. أنتى يا سهير دايماً كده

صفية

:

مش بتاعى برضه

كوكى

:

انتى ليه عملتيه اعلان يا حبيبتى.. إنتى يا سهير دايماً كده

صفية

:

انا مش سهير

كوكى

:

تبقى عفاف مش كده يقطعنى

صفية

:

مش عفاف برضه .. أنا صفية محمود

كوكى

:

يقطعنى .. صفية محمود مظبوط أخت على محمود

صفية

:

على محمود مين

كوكى

:

على محمود الملحن.. وعلى محمود العطار وعلى محمود الممثل يا شيخة بضحك معاكى.. يقطعنى

 

:

(يظهر من الخلف فاضل وفاطمة وهما يتجهان إلى موظف الاستعلامات)

الموظف

:

نعم يا أستاذ

فاضل

:

انت بتشتغل فى الحكومة

الموظف

:

أيوه

فاضل

:

اول واحد فى الحكومة يقول لى يا أستاذ.. أنت مش من هنا

الموظف

:

نعم تحت أمرك.. خلصنى

فاضل

:

قولي له يا طماطم

طماطم

:

دا البطل فاضل عبد السميع.. جاى يقابل الست صفية محمود المذيعة

الموظف

:

الست صفية محمود المذيعة

طماطم

:

ايوه يا اخويا ربنا ما يوقف لك مصلحة عند الحكومة

فاضل

:

ويعلى مراتبك فى الحكومة وتبقى كبير قوى

الموظف

:

بقول لك احنا استعلامات مش مكتب شكاوى

فاضل

:

بقول لك ايه اوعك تغلط بكلمة كده وألا كده وأنت عاملى شنبات زى ابو الهول

فاطمة

:

هو ابو الهول له شنب

فاضل

:

حلقه من اللى شافه.. أنا لازم أشوفها يعنى لازم أشوف الست صفية

الموظف

:

اطردوه بره

 

:

(يأتى رجلان من الأمن ويقذفانه خارج المكان)

فاضل

:

اوعى انت وهو سيبونى.. (يتقدم الرجلان حتى يصطدما بالست صفية وكوكى)

طماطم

:

(تجدها) الحقينا يا ست صفية

صفية

:

ايه انت مين ؟

فاضل

:

انا ابن الشرعية الدولية والنظام العالمى الجديد.. فاضل بوش فاضل عبد السميع سابقاً.

طماطم

:

احنا اللى كنا فى المستشفى مش أنتى قلت لى يا فاطمة يا مرات البطل

فاضل

:

فاكرة الوسام أهه (يقدم الوسام)

طماطم

:

والجرنال اهه (تقدم الجريدة)

صفية

:

اوقف التصوير يا مصطفى

المصور

:

حاضر

كوكى

:

(تذهب للمصور) شكلى حلو يا مصطفى

المصور

:

قوى يا ست كوكى

فاضل

:

ابتهدلنا يا ست صفية

طماطم

:

كسروا الكشك بتاعنا يا ست صفية

كوكى

:

يا حرام.. انتى تعرفى الناس الطيبين دول يا سوسو.

صفية

:

دا بطل حرب التحرير

كوكى

:

مراته حلوه قوى.. لفى يا شابه علشان أشوف قوامك

فاطمة

:

مالك يا ست هانم.. أنتى بتخطفى الستات

كوكى

:

فشر.. حلوه تجنن.. ما شفتنيش فى السينما... أنا كوكى كوكى الراقصة بتاعت السينما والمسرح .. ودا جوزك؟

فاطمة

:

دا جوزى

فاضل

:

الف انا يا ست هانم يمكن اشتغل رقاصة

كوكى

:

انت كنت فى حرب التحرير

فاضل

:

ايوه.. أنا اللى كنت بدخل مع الفدائيين أهرب السلاح للمقاومة

كوكى

:

مش معقول .

صفية

:

صور الكلام دا يا مصطفى .. قوله تانى يا فاضل

فاضل

:

تانى وتالت علشان اللى ما سمعش يسمع.. انا اللى كنت بدخل مع الفدائيين أهرب السلاح للمقاومة.

كوكى

:

(ترقص) وأنا وأنا الواد الجن اللى لا يهدى ولا يون طالع أذن نازل أون

 (يتحرك الديكور إلى مشهد كازينو كوكى بوكى.. وكشك سجاير أمام الكازينو..)

 

:

الزمان : ليل

طماطم

:

(تقف طماطم امام الكشك وتغنى أغنية)

كوكى

:

(قادمة وهى تدخل) مساء الخير

طماطم

:

مساء النور

كوكى

:

بنت يا فاطمة مش حتعقلى وتيجى تشتغلى معايا

طماطم

:

يا ست كوكى أنا لا بفهم فى الرقص ولا فى الحاجات دى

كوكى

:

على كيفك يا حبيبتى .. يقطعنى لو قلت لك تعالى اشتغلى معايا تانى

طماطم

:

يا ست كوكى ربنا يخليكى عملتلنا كشك ولا بيجى لنا عسكرى ولا ضابط واللى بيجى بيمشي على طول حقهم ينتخبوكى والنبى وزيرة للغلابة اللى زينا

كوكى

:

فاضل فين ؟

طماطم

:

فاضل راح يجيب شويه بخور علشان يبخر لك المحل ويبخر الدكان.

كوكى

:

ربنا يخليه.. عن أذنك يا حبيبتى (تدخل)

بدر

:

(يدخل شاب عربى فى العشرينات يرتدى فانلة عليها صورة بوش والعلم الأمريكى وطاقيه وهو فى حالة سكر)

بدر

:

عندك سجاير؟

فاطمة

:

عندى كليوباترا

بدر

:

سجاير اجنبى

فاطمة

:

لا والنبى يا خويا

بدر

:

(يلاحظ جمالها) انتى بتعرفى تطبخى كويس

فاطمة

:

ايوه يا خويا

بدر

:

تعرفى ترتبين البيت عدل

فاطمة

:

ارتب عشر بيوت بتسأل السؤالات دى ليه

بدر

:

عدل.. عدل.. انا ابيك تجين عندى فى البيت كل يوم الصبح للضهر.

فاطمة

:

مش فاهمة

بدر

:

مش فاهمة ايه .. انا اديك 500 خمسمائة جنيه فى الشهر يلا

فاطمة

:

مش فاهمة ياخويا تدينى 500 جنيه فى الشهر ليه ؟

بدر

:

انتى حتيجينى البيت تنضفين لى وتخدمينى

فاطمة

:

العنوان غلط يا خويا.. انا فاطمة فاطمة مرات البطل فاضل.. شايف الوسام دا

بدر

:

شايفه

فاطمة

:

دا خده فاضل لما كان عندكم فى حرب التحرير

بدر

:

فاضل مين ؟

فاطمة

:

فاضل جوزى

بدر

:

انتى متجوزة؟

فاطمة

:

ايوه يا خويا بقولك فاضل كان عندكم .. أنت منين يا خويا؟

بدر

:

انا من البلاد المحرره

فاطمة

:

يا أهلاً وسهلاً

بدر

:

أهلا فيك.

فاطمة

:

مش جوزى فاضل كان هناك ؟

بدر

:

وأنا كنت هنا (يضحكان)

فاضل

:

(يدخل) ايه دا واقفه تضحكى مع راجل غريب ياللعار

بدر

:

انا مش غريب

فاطمة

:

دا من البلاد المحررة

فاضل

:

انت من البلاد المحررة .. كذاب انا ما شفتكش هناك

بدر

:

الجواز أهه .. شوف أنا من هناك وألا لأ.

فاضل

:

غريبه.. ما هو أنا كنت هناك .. انت كنت فين ؟

بدر

:

انا كنت هنا .. بابكى بدل الدموع دم.

كوكى

:

(تخرج) يا فاضل يا فاضل

فاضل

:

ايوه

كوكى

:

ازيك يا بدر.

بدر

:

ايشلونك يا ست كوكى

فاضل

:

انتى تعرفى بدر

كوكى

:

ما هو مزروع هنا بقاله سنين

فاضل

:

هنا فين ؟

كوكى

:

هنا فى البار

فاضل

:

اخس عليك وتقولى بابكى واسمك من البلاد المحررة وأنا هناك

بدر

:

انت حتدينى محاضرة انت هنا وأنا هناك .. وانا هناك وأنت هنا.

كوكى

:

ادخل يا بدر.. ادخل

بدر

:

انا عايز البنت دى تيجى تنضف لى وتطبخ لى

كوكى

:

دى يا حبيبى مرات فاضل.. ادخل.. ادخل (تدفعه للدخول فى الكبارية) اسمع يا فاضل

فاضل

:

نعم عايزانى انا كمان انضف لك واغسل لك

كوكى

:

لا عايزاك تخطف رجلك لحد الموسكى العنوان دا تجيب لى بتاع الطبلة من قفاه وبسرعة سامع

فاضل

:

هناك كنت اروح أودى سلاح وأسلم أوامر وخطط وهنا أنده مطبلاتى

كوكى

:

يا حبيببى هناك كان حرب وخلصت فوق بقى وعلى كل حال أنا غلطانه يقطعنى لو طلبت منك حاجة تانية

شخص 2

:

(الطبال) مساء الخير يا ست الكل اتأخرت عليكى ؟

كوكى

:

اتأخرت وبس مش قلت لك دخل تليفون فورى.. يقطعنى إنى بشغلكم

شخص 2

:

مقدم عليه من تلت سنين يا ست

كوكى

:

طيب ادخل .. ادخل (يدخل الكباريه)

فاطمة

:

أنا مش عارفه ليه دايماً أنت بتكلمها كده

فاضل

:

مهو مش اخر المتمة تبقى انتى رقاصة وأنا ابقى بقرنين ولا تور للهانم.. صحيح هى الحكومة ما تقدرش تتكلم معاها لأن معاها أسلحة جامدة شنبات كبيرة فى الوزارة فى جيبها اليمين وملابس حساسه فى جيبها الشمال لكبار رجال الأعمال متمكنة .. يقطعنى

جورج

:

(جندى أسمر يدخل بملابس كاوبوى) هاللو

فاضل

:

وعليكم السلام ورحمة الله وبركاته .. يا أهلا وسهلاً.

جورج

:

عندك كبريت ؟ you have matche

فاضل

:

الصوت دا مش غريب والكلمة دى مش غريبة

جورج

:

عندك كبريت

فاضل

:

عندك يا ولد الفرطوس (يتذكره)

جورج

:

(يتذكره) فاضل جورج بوش

فاضل

:

جورج عبد السميع جيت امتى من امريكا

جورج

:

من أسبوعين ورحت أزورك فى الفلاحين

فاضل

:

شفت العمده

جورج

:

العمدة قال عليك مت

فاضل

:

اهو العمده ده اللى خد حقى

فاضل

:

ازيك يا جورج

جورج

:

الله يسلمك إزيك انت

فاضل

:

فاكر يا سمبو

 

:

(يدور الكشك ويتحول إلى خندق وأضواء الكباريه كأنها أضواء المعارك على المسرح .. كل منهما يجلس)

جورج

:

(يجلس يعد أوراق دولاريه) سفنتى.. إيتى.. ناينتى.

فاضل

:

فلوس ايه دى يا سمبو

جورج

:

دى فلوس بتاعتى .. مرتبى

فاضل

:

إنت بتاخد كام يا سمبو؟.

جورج

:

ألف ومتين دولار فى الشهر وإنت بتاخد كام

فاضل

:

متين جنيه قصدى ألف ومتين .. متين قصدى ألف.. باقولك ايه.. ايه رأيك تقبض إنت مرتبى شهر وأنا أقبض مرتبك شهر

جورج

:

حلوه دى مش ممكن

فاضل

:

ليه يا سمبو

جورج

:

انا مع جورج بوش

فاضل

:

وانا اسمى فاضل بوش بس هناك فى مصر.. حلوه دى

جورج

:

إنت جوازك موس زى بتاعى

فاضل

:

خد جوازى وادينى جوازك اقبض بيه

جورج

:

إحنا دول صديقه

فاضل

:

واحنا دول شقيقه.. الشقيقة أقل ليه.. اسمع إنت تبقى دول شقيقه وأنا ابقى دول صديقة وأخد زيك.

جورج

:

موس ممكن

 

:

(تخرج بنات جميلات تمر من جوار المعسكر تحمل السلاح)

جورج

:

دول مجندات ليزا وبيزا روزا قوات مساعدة مسلحة

جورج

:

حلو قوى إحنا أصحاب

فاضل

:

احنا كده حلوين قوى يا جورج من 23 دولة

جورج

:

احنا كلنا ولاد الشرعية الدولية والنظام العالمى الجديد

فاضل

:

تعرف يا جورج سمبو أنا نفسى فى ايه نفسى كلنا كده ولاد الشرعية الدولية. والنظام العالمى الجديد نحرر البلد دى ونطلع منها كلنا برابطة المعلم نحرر القدس يا سلام يا سلام.

 

:

(يدور الخندق ويتحول إلى ما كان عليه .. كشك والكبارية)

فاضل

:

فاكر يا سمبو لما كان يدولك ستة قزايز ميه صحه كل يوم تشرب وتستحمه وأنا يدونى قزازتين فى اليوم.. كنت جدع بتدينى أربعه قزايز من بتوعك .. فاكر يا سمبو

جورج

:

انا جاى أتفرج على الرقص البلدى

فاضل

:

خش يا سمبو خش.. (يدخل سمبو الكباريه)

 

:

(يظهر سالم .. شاب من البلد المحررة)

سالم

:

عندك بارد

فاضل

:

عندى بيبسى وسفن وكوكا كولا.. وكل حاجة

سالم

:

سفن اب

فاضل

:

مين سالم

سالم

:

مين فاضل.. ايشلونك يا القاطع.. سألت عنك ونيك فينك بعدما ما إتصابت.

فاضل

:

يا فاطمة يا طماطم.. البنت طماطم فين؟

طماطم

:

(تجرى قادمة من داخل الكبارية) ايوه يا فاضل

فاضل

:

بتعملى ايه عندك يا بنت

طماطم

:

بتفرج يا خويا على الناس اللى بترمى الفلوس تحت رجلين الست كوكى

فاضل

:

دا سالم. سالم كان هناك فى البلد المحررة كنت بوصله السلاح والرسائل.

طماطم

:

سالم أخو بدر

فاضل

:

بدر اخوه صحيح بس أخ عن اخ يختلف

طماطم

:

ازيك

سالم

:

ايشلونك انت.. إيش مسويين.. وإيش سويت لما رجعت

فاضل

:

اهه وسام أخدته من الرئيس وصورتى معاه اهيه

سالم

:

عال.. عال ماشاء الله الحين انت مبسوط

فاضل

:

الحمد لله.

سالم

:

وليش ما جيت تزورنا وتهنينا

فاضل

:

رحت السفارة قالوا لى إنت مين.. معاك كارت زيارة.. معاك عدم ممانعة.. معاك عقد عمل.. مين وجه لك دعوة.. بهدلونى يا سالم يا أخويا.

سالم

:

حقك على ما يدرون.. إزاى أنت لازم يكرموك إنت جبت لنا سلاح وأول واحد دش البلد وإنصاب.

فاضل

:

والواد سمبو إبن اللئيمة اقول له خش معايا يقول لى لا خش أنت.. المصريين الأول الأشقاء.. كل دا علشان الألغام تيجى فيا وهو سليم.. ما هو صديق مش شقيق

سالم

:

انا لازم أشوف مشكلتك لازم السفارة تعمل الواجب معاك البلد كلها. إنت ولد الديره ما يكون عندك أى زعل.. بكره الصبح السفارة كلها مستنياك وأنا ح أمر عليك أخدك إنت والأخت فاطمة مشكورين فى السفارة.. عن إذنك .. إلى اللقاء.. الساعة 7 بكره بعد الظهر.

فاضل

:

الله إنت مش جاى تسهر مع بدر.

سالم

:

انا مش بتاع السوالف دى يا فاضل

فاضل

:

الله يعطيك العافية

طماطم

:

فاضل

فاضل

:

فاطمة.. الدنيا ابتسمت لنا حيقدرونى يا فاطمة

طماطم

:

وحتسافر هناك

فاضل

:

وحيدونى عقد عمل

طماطم

:

وحيحتفلوا بيك

فاضل

:

أنا ح أقولهم انا مش مسافر

طماطم

:

لا يا خويا نسافر لنا كام شهر ونرجع

فاضل

:

افرضى يا فاطمة قالو لى تطلب ايه.. نعوضك بيه عنا للى ضاع منك وعن إصابتك

طماطم

:

اطلب شقه

فاضل

:

ودكان

طماطم

:

وعربيه

فاضل

:

عاش فاضل بوش.. عاش بوش.. وام بوش.. وابو بوش

 


 

اللوحة التاسعة

 

:

(يتحول الديكور من المشهد السابق إلى مبنى سفارة.. ديكور تجريدى.. صوت مجاميع فى الخلفية.. أعلام موضوعة.. إضاءة زرقاء وناس ترتدى ملابس فاخرة.. موسيقى تشبه الحلم.. دخان.. مع حركة مسرحية أشبه بخطوات وحركة حلم.. يقف فاضل وطماطم.. يظهر السفير يحمل الوسام.. يتقدم السفير ناحية فاضل)

السفير

:

باسم الدورة المحررة.. نحتفل اليوم بالبطل فاضل عبد السميع

فاضل

:

نفسك فى ايه يا طماطم قولى

طماطم

:

نفسى فى شقة حلوه

فاضل

:

فى الزمالك ألا المهندسين

طماطم

:

لا فى أى حته.. إن شاء الله فى السيدة زينب أو سيدنا الحسين

السفير

:

باسم السفارة والدولة المحررة نرحب بالبطل

فاضل

:

وايه كمان يا طماطم قولى ما تكسفيش يا بت

طماطم

:

(وهى تضحك) نفسى فى عربية صغيرة زى بعضه.. نعملها تاكسى بعد الظهر.. والصبح توصلك الشغل.

فاضل

:

ايوه ما هو أنا ابن الحكومة ولازم يشوفولى شغلانة حلوه

طماطم

:

ايوه.. أنت سمعت الريس بيقول عليك انت وصحابك دول أولادنا.. يعنى أولاد الحكومة

السفير

:

(مع موسيقى .. ورام) باسم كل الشرفاء نقدم للبطل الفدائى الكبير

طماطم

:

أغمض عينى . أغمض عينى .. شقة وعربية يا رب

فاضل

:

وشغلانة حلوه يا رب فى الحكومة

طماطم

:

غمض عينك

فاضل

:

اهه غمضت (يغمض عينه)

السفير

:

باسم كل الأبطال نقدم للبطل فاضل عبد السميع وسام المحاربين العظماء

فاضل

:

السلطانية

طماطم

:

وسام تانى .. وسام ايه.. احنا مش عايزين وسام.. مش عايزين وسام.. عايزين ناكل ونشرب.

فاضل

:

انا عايز النظام العالمى الجديد.. عايز الشرعية الدولية.. عايز أبويا بوش.

 

:

(صوت سيارة نجده .. ضوضاء فلاشر)

بـــــــــــلاك


 

اللوحة العاشرة

 

:

يتغير الديكور السابق إلى ديكور داخل كباريه كوكى انتظرنى)

(الجمهور يصفق)

الجمهور

:

عايزين طماطم.. عايزين طماطم

كوكى

:

(تخرج للجمهور) يا جماعة.. طماطم عندها فرح ابن الوزير وزمانها جايه

حلمى

:

(حلمى يجلس مع الجمهور) احنا عايزينك انت يا ست كوكى

كوكى

:

الان اقدم لكم المطرب الشعبى عوف ابو كبه

 

:

(تدق الموسيقى.. ويخرج عوف ابو كبه.. شاب جميل يثير حوله صخب ويغنى.. بينما كوكى تتجه ناحية حلمى)

كوكى

:

شايف يا حلمى.. البنت عملت ايه فى الناس

حلمى

:

انا مش مصدق اللى بشوفه

كوكى

:

اذا كانت عملت كده فى سنه.. أمال حتعمل ايه بعد كده؟

حلمى

:

انا من رأيى إنك تخفيها

كوكى

:

ما اقدرش يا حلمى.. دلوقت.. البنت دى ممكن اكسب من وراها دهب

حلمى

:

وانت

كوكى

:

انا عايزة اشتغل فى السينما والتليفزيون وافتح مرسم واسميه باسمى يا حلمى واعمل مسرحيات كوميدى

حلمى

:

فكره هايلة يا كوكى

كوكى

:

بس اللى الواد الزفت اللى اسمه فاضل

حلمى

:

ما احنا بعتناه الخليج ودبرناله عقد عمل حارس وحيرجع بعد سنة

كوكى

:

ما هى السنة عدت وزمانه راجع

حلمى

:

صحيح عدت بسرعة

كوكى

:

ما هى طماطم خايفة انه يرجع ويعرف أنها بتشتغل رقاصة

حلمى

:

اكيد حتحصل مشكلة

كوكى

:

انا مش عايزة مشاكل معاه خلصنى منه

حلمى

:

أخلصك منه إزاى ؟

كوكى

:

ما اعرفش

حلمى

:

اقتله

كوكى

:

انا ما قلتش اقتله يا حلمى

حلمى

:

أمال اتخلص منه ازاى

كوكى

:

دى شغلتك ومشكلتك حلها

 

:

(تدخل طماطم مسرعة وهى تحمل حقيبه فى يدها وترتدى روب فوق بدلة الرقص)

طماطم

:

انا اسفه قوى يا ست كوكى

كوكى

:

يلا اطلعى نمرتك

طماطم

:

حاضر

 

:

(الجماهير تصفق.. وتقف بينهم طماطم مع أغنية المطرب)

 

:

(يدخل أحد رجال الأمن يهمس فى أذن كوكى)

كوكى

:

بتقول إيه !!

رجل الأمن

:

واحد اسمه فاضل عايزك

كوكى

:

عايزنى

 

:

الحق يا سبع البرومبة .. الواد وصل

حلمى

:

ايه اللى جابه هنا

كوكى

:

احنا مش فى ايه اللى جابه هنا.. روح شوفه

حلمى

:

انا أشوفه

كوكى

:

ايوه .. دخله أوضة المكتب وشوف إيه الحكاية

حلمى

:

حاضر.. حاضر..

 

:

(أثناء الأغنية يخرج بعض الزبائن يلقون بمئات الدولارات)

 

:

(عند انتهاء الأغنية وصياح الجماهير وإنتهاء فقرة المطرب مع طماطم يستدير الديكور إلى مكتب كوكى)

 

:

(حلمى يدخل ويشير إلى فاضل كى يدخل خلفه)

حلمى

:

اتفضل يا فاضل .. يا أهلا وسهلاً .. حمد الله على السلامة.. مش تضرب تليفون يا راجل وألا تبعت جواب علشان نقف نستناك

فاضل

:

(وهو يقف وتفر عينه بالبكاء) طردونا يا حلمى باشا.

حلمى

:

مين اللى طردوكم

فاضل

:

هما طردونا.. قال ايه مش عايزين المصريين.. أنا ومعايا يجى تلاتين الف

حلمى

:

معقولة كده.. ازاى يطردوا المصريين

فاضل

:

هى دى الحقيقة.. طردونا من غير ما يدونا حقوقنا.. بهدومنا كده سالط مالط

حلمى

:

لا حول ولا قوة الا بالله .. سالط مالط

فاضل

:

هى طماطم فين.. رحت البيت قالوا لى سابت البيت وعزلت.. وما حدش عارف عزلت فين

حلمى

:

ما هى يا سيدى أول انت ما حولتلها فلوس من سفرك لقت شقة لقطة فى المهندسين .. اخدتها على طول

فاضل

:

يلا سلام.. يا سلام طول عمرها ست مدبرة

حلمى

:

امال.. ايه رأيك نروح ونسبقها على البيت

فاضل

:

نسبقها على البيت

حلمى

:

قصدى نروح لها البيت الجديد

فاضل

حلمي

:

:

الله يخليك ..

 يلا يا بطل.. تعال نحتفل بيك واوديك البيت

فاضل

 

:

متشكر .. يلا يا حلمى باشا.. احسن طماطم وحشانى قوى

حلمى

:

اتفضل.. اتفضل.. (يحاول أن يخرجه من الغرفة) اتفضل انا جى وراك حالاً (يخرجان .. تدخل كوكى وطماطم)

طماطم

:

فيه ايه بس يا ست كوكى.. أنا مش ح اقعد مع زباين زى ما قلتيلى

كوكى

:

انا عايزاكى فى موضوع تانى

طماطم

:

عارفه موضوع ابن رئيس الحى.. دا مجنون قال ايه عايز يتجوزنى.. يتجوزنى ازاى وأنا ست متجوزة

كوكى

:

تطلقى وهو يتجوزك

طماطم

:

واسيب فاضل

كوكى

:

ما هوفاضل حيسيبك

طماطم

:

يسيبنى ازاى ؟

كوكى

:

هو ما يعرفش إنك رقاصة

طماطم

:

أنت اللى خلتينى اشتغل رقاصة

كوكى

:

لا يا حبيبتى .. لا (وهى تروح) انت كان لك كيف تركبى عربية وتبقى زى.. ما فيش واحدة ست بتعمل حاجة غصبن عنها.. سامعة وألا لأ بدليل انك اتعلمتى فى شهر

طماطم

:

صحيح.. انا اللى اخترت

كوكى

:

اسمعى فاضل رجع

طماطم

:

رجع يا مصيبتى .. رجع امتى وفين.. ما اتصلش بيا ولا بعت جواب

كوكى

:

على كل حال.. حلمى ابو كارت اتصرف.. راح يعشيه وبعدين حيوديه على البيت

طماطم

:

انهو بيت

كوكى

:

البيت الجديد طبعاً

طماطم

:

يا لهوى .. يا لهوى

كوكى

:

حلمى بيقول طردوه مع المصريين

طماطم

:

واقابله ازاى

كوكى

:

خلاص ما تقابلهوش انت.. اقابله أنا وأشوفه عايز كام ياخدهم ويطلقك وكل واحد يشوف مصلحته

طماطم

:

لا.. لا سيبينى أنا اتكلم معاه

كوكى

:

انا لازم أكون معاكى.. أنا وحلمى.. احسن يستعبط وألا يستهبل ويمد ايده عليكى وألا يعمل حركة نص كم.

طماطم

:

ح اغير هدومى حالا واجى معاكى

كوكى

:

بنت يا شربات

شربات

:

(تدخل) ايوه يا ست الكل

كوكى

:

غيري هدوم الست

شربات

:

حاضر

 

:

(تخرج كوكى. تلاحظ تغيير وجه طماطم) مالك

طماطم

:

فاضل

شربات

:

ماله

طماطم

:

رجع

شربات

:

امتى

طماطم

:

جه هنا

شربات

:

وعرف

طماطم

:

لا

شربات

:

الحمد لله

طماطم

:

بس لازم يعرف

شربات

:

ومين اللى حيقوله

طماطم

:

أنا

شربات

:

يا مصيبتى.. وايه اللى جابه هنا

طماطم

:

ما هو عارف إنى بشتغل عند الست كوكى.. بنضف لها البيت.. واحنا خلينا البوسطة تجيب لنا الجوابات هنا

شربات

:

وما قلتلوش على البيت الجديد

طماطم

:

انا خايفة عليه

شربات

:

أنا خايفة عليكى انت

طماطم

:

يلا بسرعة نروح البيت

شربات

:

يا رب سترك.. استر يا ستار

جرسون

:

(يدخل الجرسون ومعه بوكيه ورد) الورد دا جالك من عسل باشا

طماطم

:

بلا عسل بلا زفت (تلقى بالورد بعيدا)

بــــــــلاك


 

اللوحة الحادية عشر

 

:

(يتغير الديكور إلى شقة طماطم وهى شقة فاخرة.. وفى الصالون تسير طماطم وتروح وتجيئ.. تسير خلفها شربات.. تجلس كوكى تضع قدما على قدم فى ثبات)

كوكى

:

ما تقعدى يا بنت الناس

طماطم

:

اقعد ازاى بس.. واهدى ازاى

كوكى

:

زمان حلمى جايبه وجاى

شربات

:

يمكن ربنا يهديه ويشتغل معانا

طماطم

:

انا عارفه فاضل كويس

كوكى

:

عارفة ايه ؟

طماطم

:

عارفة إنه مش حيوافق (ترتدى طماطم ملابس محجبة)

كوكى

:

انت لابسه كده ليه

طماطم

:

ما هو كتبلى جواب.. وقال لى اتحجبى

كوكى

:

لسه شوية يا طماطم لما تعتزلى

طماطم

:

اعمل ايه واخللى ايه (وهى تسير ذهابا واياباً وتنظر من النافذة)

شربات

:

يا طماطم اهدى شويه .. خلينا نفكر.. حنقول ايه ونعمل ايه؟

كوكى

:

انا من رأيى أنك ما تقابلهوش وخلينى انا أقابله واتفاهم معاه..

طماطم

:

لا.. لا يا كوكى الله يخليكى.. خلينى انا اتفاهم معاه أنا عارفاه.. اكتر ما بيعرف نفسه.. فهماه اكتر ما بيفهم نفسه.. قسمنا رغيف العيش والضحكة والدمعة سوا.. حتى الحلم بنحلمه سوا

كوكى

:

سوا.. سوا.. حتغنيلى يا بنت

طماطم

:

اعمل ايه ؟ اعمل ايه انا قلت حيسافر له كام سنة ويرجع

كوكى

:

اهه رجع بدرى احسن.. علشان كل واحد يشوف مصلحته

طماطم

:

طيب سيبينى أنا اكلمه لوحدى.. بلاش حد يبقى هنا

كوكى

:

انت يا بنت عبيطة ولا عبيطه .. بعدين يضربك بسكينه وألا حاجة.. انت يا حبيبتى ثروة قومية.. لازم نحاف عليكى

 

:

(جرس الباب.. الكل خائف متردد .. هلع)

شربات

:

اما اروح افتح

كوكى

:

لا.. أنا اللى ح افتح (تجلس طماطم منهاره.. يدخل حلمى وخلفه فاضل) يا أهلا وسهلا .. يا أهلا وسهلاً

حلمى

:

مساء الخير يا جماعة

فاضل

:

الله انت هنا يا ست كوكى.. فين طماطم.. طماطم.. طماطم

طماطم

:

فاضل.. فاضل

كوكى

:

أحمد .. منى

حلمى

:

عصافير والله

فاضل

:

انا مش مصدق نفسى.. مش مصدق نفسى.. إنى شفتك وفين فى المهندسين معقولة شقة بألف جنيه خلو رجل فى المهندسين

طماطم

:

اصل صاحبها واحد خواجة وكانت شربات تعرفه وكان مسافر وكان عايز ألف جنيه ويسيبها ويسافر

فاضل

:

يا سلام .. على المروءة .. البنت شربات دى تستاهل تتشرب وتتاكل

شربات

:

ربنا يخليك يا سى فاضل

فاضل

:

عماره فيها تلت اسانسيرات بالف جنيه يا بلاش

كوكى

:

انت راجل اهبل ولا عبيط

فاضل

:

ست كوكى.. وحشانى وحشانى.. والله ما شفتكيش

كوكى

:

اهلا (بضيق بعض الشئ) إزيك

فاضل

:

حلمى بيه الراجل الأصيل وست الكل كوكى جنبك أهم يا طماطم

طماطم

:

ايوه

فاضل

:

(ينظر للصالون) ايه دا.. فيديو .. تليفزيون ملون.. وتليفون كمان

كوكى

:

التليفون بعشرة جنيه

حلمى

:

والفيديو بعشرين جنيه

شربات

:

والتلفزيون بتلاتين جنيه

فاضل

:

الله .. الله مصر بقت رخيصة قوى

حلمى

:

بعد اتفاقية الجات يا حبيبى

فاضل

:

على كده انا معايا خمسمائة جنيه اروح افتح بيهم محل

حلمى

:

(مقاطعاً) محل سيارات .. العربية دلوقتى بميه وخمسين جنيه

فاضل

:

الله.. الله سامعة يا طماطم انت ساكتة ليه ما اشترتيش ليه

طماطم

:

اشتريت (وهى تبكى)

فاضل

:

بتعيطى.. إنك اشتريتى عربية يا بت أنا فرحان إنك شاطره ودبرتى نفسك وجيبتى كل حاجة

كوكى

:

سامعة.. اهه فرحان علشانك

شربات

:

(تزغرد) الله عليك يا سى فاضل

حلمى

:

اهى دى الرجال اللى بصحيح تفرح لستاتها

فاضل

:

أمال اذا ماكنتش أنا افرح لها.. مين اللى يفرح لها (جرس الباب.. الكل ينظر إلى بعضه) روحى افتحى الباب يا طماطم.

طماطم

:

حاضر (تذهب لتفتح الباب.. يدخل عسل بيه حامل بوكيه ورد)

عسل

:

جننتينى .. هبلتينى.. معقولة يا طماطم تدوخينى وراكى كل دا.. ليه تعملى فيا كده (يمسك يدها)

طماطم

:

اوعى ايدك.. ابعد عنى

عسل

:

مش قادر.. مش قادر فى قلبى نار.. طفى لى النار

فاضل

:

وقف عندك يا جدع انت الشقة غلط.. أنت مين ؟

عسل

:

لا .. أنت اللى مين ؟

طماطم

:

عسل بيه ارجوك

عسل

:

(ينظر إلى حلمى وكوكى وشربات) مساء الخير يا جماعة أسف ما شفتكوش اصلكم عارفين أنا مهووس بطماطم.. مش قادر لما بترقص بتجننى بتجننى شفتها فى الرقصة الأخرانية.. مع أغنية سلام مربع للجدعان مش معقول الكبارية كله ولع.. ولع (يرقص)

فاضل

:

انا مش فاهم حاجة.. مين اللى يرقص يا جدع انت الست كوكى مش طماطم

عسل

:

كوكى مين.. كوكى راحت عليها خلاص.. طماطم راقصة شارع الهرم الأولى

فاضل

:

طماطم (يصاب بفزع) طماطم راقصة شارع الهرم الأولى

طماطم

:

اصل انا عايزه افهمك (وهى تبكى)

فاضل

:

تفهمينى ايه.. شقة فى المهندسين بالف جنيه وتليفزيون بعشرين وعربية بميت جنيه كل دا بعد اتفاقية الجات

طماطم

:

امال كنت عايزنى اعمل ايه فى القاهرة.. مفيش شغل غير خدامة فى الشقق المفروشة.. اقبال اللى يسوى واللى ما يسواش.. واللى يفكر إنى واحدة من اياهم ..و

فاضل

:

هربتى من الخدمة فى البيوت ورقصتى قدام كل الناس

عسل

:

مين دا يا كوكى.. اللى بيخللى طماطم تبكى

فاضل

:

انا الحمار جوزها.. مش عارفنى يا عسل باشا.. يا ابن رئيس الحى

كوكى

:

خلصنا وقول عايز كام وتطلقها

طماطم

:

لا.. ما تقوليش كده يا كوكى

فاضل

:

انت جايه انت وحلمى بيه علشان تساومونى

حلمى

:

يا ابنى الحياة صفقات وتجارة.. تاخد كام؟

فاضل

:

تشترى الوسام بكام.. معايا وسامين.. اظن ما عندكش رد.. ما تتكلم وسامين بطولة بكام

حلمى

:

(لا يرد)

فاضل

:

طيب تشترى طماطم بكام ؟

كوكى

:

عايز كام خلصنا

عسل

:

اسمع يا ولد انت لو ما طلقتهاش واخدت مبلغ معقول ومشيت ح اكسر دماغك وادخلك السجن فى تهمة كبيرة

فاضل

:

لا .. أنا عاقل يا سعادة الباشا.. سيبونى مع طماطم شويه وانا حاريحها واريحكم كلكم

عسل

:

فتشه يا حلمى بيه .. احسن يكون معاه سلاح

حلمى

:

حاضر يا باشا (يفتشه) مفيش حاجة معاه

عسل

:

ولد .. أوعى تعمل اى حركة ولو عوزتى حاجة يا طماطم او عمل اى حركة احنا واقفين على الباب اهه (يخرجون جميعاً)

فاضل

:

(فاضل وطماطم منفردين) أنا

طماطم

:

أنا

فاضل

:

أنا (ينفجر فى البكاء) عملت لك ايه علشان تعملى كده فيا

طماطم

:

مش انت اللى عملت ولا أنا.. هم اللى عملوا فينا (تشير إلى صالة الجمهور) معاك وسام واتنين لكن مالهومش لازمة.. ما جبوش وظيفة ولا بيت ولا عربية ولا تلفزيون ولا تليفون ولا حاجة.. كنت عايزنى اعمل ايه.. كيلو الجبنة الرومى 18 جنيه كيلو الجبنة البيضا ب 8 جنيه كيلو البسطرمة بـ20 جنيه كيلو اللحمة بـ20 جنيه كيلو الفراخ بـ7 جنيه وانت بعت لى ميت جنيه اعمل بيهم ايه ؟ واكل بيهم كام يوم ؟ قول لى .. يا إما كنت اشتغل رقاصه.. يا إما اشتغل شغلانة تانية.. قلت رقاصة وبشرفى.. ايوه انا رقاصة لكن اشرف من نسوان كتير دايره على حل شعرها فى الشوارع ومن عائلات.. انا صحيح رقاصة لكن حافظت لك على شرفك.. واحلف لك ما حد لمسنى من يوم ما سافرت

فاضل

:

وانا ما اقدرش يا طماطم اعيش جوز رقاصة وألا اشتغل طبلة.. انت طالق طالق .. طالق (يصفق عسل وحلمى وكوكى)

طماطم

:

(تخرج من الباب وهى تبكى)

حلمى

:

مبروك

عسل

:

الف مبروك حبيبتى

شربات

:

مبروك يا ست الكل (تزغرد)

بــــــــــــلاك


 

اللوحة الأخيرة

 

:

(يتحول الديكور فى خلال الأصوات إلى مستشفى الأمراض العقلية)

 

:

(يدخل المرضى على أسرتهم هادئين كل منهم فى هدوء تام.. رجل فى سن 70 سنة.. رجل فى سن 60 سنة.. رجل فى سن 50 سنة.. رجل فى سن 40 سنة)

الممرض

:

(يضع السرير الجديد.. يحدث المرضى) فيه واحد زميلكم جاى

 

:

(يتركون جميعهم الجرائد والمجلات وينظرون باهتمام)

ممرض 2

:

(يدفع بفاضل) ادخل يا اخويا

فاضل

:

السلام عليكم اعرفكم بنفسى انا فاضل عبد السميع.. دى صورتى مع الريس ودا وسام من الرئيس فى حرب التحرير

مريض 1

:

وانا بطل حرب 48 ودا وسام من الملك فاروق ودى صورتى معاه

مريض2

:

وانا بطل حرب 56 ودا وسام من الرئيس ودى صورتى معاه

مريض 3

:

وانا بطل حرب 67 ودا وسام من الرئيس ودى صورتى معاه

مريض 4

:

وانا بطل حرب 73 ودا وسام من الرئيس ودى صورتى معاه

د. عزمى

:

(يدخل مندفعاً) انا الدكتور عزمى .. لواء طبيب.. مش عايز أى حد يعامل الأبطال دول بصورة وحشه.. دول حملة الأوسمة.. مين دا.. انت مين يا ابنى اسمك ايه؟

فاضل

:

انا فاضل

د. عزمى

:

اى طلبات أى حاجة تعوزها يا فاضل قول لى يا ابنى

فاضل

:

(يقف فاضل ويجمع الأوسمة من زملائه) إحنا لنا طلب واحد.. قول للريس وكل ريس.. إحنا اللى حاربنا مش عايزين نياشين ولا أوسمه.. عايزين عيشه كريمة.. عايزين شقة فى أى مكان .. تصلح لحياة عيلة تصلح للإنسان.. عايزين شغلانة مضمونة فى الحكومة.. عايزين عربية صغيرة نروح بيها الصبح الشغل وبعد الضهر نعملها تاكسى بالعداد.. قول للريس ايه فايدة الوسام مع مواطن جعان ولا له سكن ولا له أمان...

 

ستار النهاية – تمت بحمد الله

القاهرة 1995

تصنيف :

0 التعليقات:

إرسال تعليق

Twitter Delicious Facebook Digg Stumbleupon Favorites More